Mel Gibson nuk po realizon dokumentar për trafikimin seksual të fëmijëve në Ukrainë

Mel Gibson nuk po bën asnjë dokumentar në lidhje me trafikimin seksual të fëmijëve. Themeluesi i një organizatë jofitimprurëse kundër trafikimit në Utah kishte sugjeruar më parë aktorin të ofronte mbështetje fillestare për një dokumentar, por ai konfirmoi për Associated Press se Gibson nuk ishte i përfshirë në realizimin e filmit.

 

Një postim në Facebook pretendon se aktori i famshëm i Hollivudit Mel Gibson po bënte një dokumentar për trafikim seksual të fëmijëve, duke përfshirë vende të tilla si Ukraina, dhe teksti thotë:

E rëndësishmja, Putin u dënua për trafikim të fëmijëve. Kjo është gjithçka që duhet të dini për Perëndimin “objektiv” dhe “demokratik”.

Gjykata Penale Ndërkombëtare në Hagë ka lëshuar një urdhër arresti për presidentin Putin nën dyshimin për krime lufte për shkak të përfshirjes së tij të mundshme në rrëmbimin e fëmijëve nga Ukraina.

Gjykata deklaroi se Putini dyshohet për një krim lufte, deportim dhe zhvendosje të paligjshme të një popullsie (fëmijësh) nga territoret e okupuara të Ukrainës në Rusi. Nuk do të thotë se ai është i dënuar. Për t’u dënuar, Putini do të duhej të paraqitej para një gjykate në Hagë, ku do të gjykohej për atë që dyshohet.

Teoria se “Perëndimi demokratik” është i përfshirë në një lloj tregtie të paligjshme të fëmijëve dhe organeve në Ukrainë nuk është asgjë e re. Asnjë provë nuk është ofruar për pretendime të tilla dhe ato janë pjesë e një teorie të njohur konspirative dhe sigurisht të mirëpritura në korpusin e narrativave të dezinformatave ruse që janë intensifikuar që kur Moska filloi pushtimin e saj në Ukrainë vitin e kaluar.

Nuk është hera e parë që kundërshtarët e Perëndimit përhapin histori të tilla të sajuara se janë vendet perëndimore ato që abuzojnë me fëmijët dhe heronj të supozuar, si Putini apo Donald Trump, po i shpëtojnë ata. Të tilla histori janë thurur dhe ende po thuren për ish-presidentin e Shteteve të Bashkuara, Trump, duke e paraqitur atë si gjoja shpëtimtarin e mijëra fëmijëve. Vërtetmatësi ka shkruar për këto teori konspirative dhe ato po përdoren qartë për të lavdëruar karakterin dhe veprën e Putinit, pa u përballur me faktet.

Sa i përket pretendimit se aktori i famshëm hollivudian Mel Gibson po bënte një dokumentar për trafikimin e paligjshëm të fëmijëve, duke përfshirë vende si Ukraina edhe ky nuk është i vërtetë dhe është mohuar nga publicisti i aktorit.

Ai nuk po realizon dokumentar, tha për Associated Press Alan Nierob, publicisti i vjetër i Gibson.

Pretendimi duket se rrjedh nga komentet e bëra në fillim të këtij viti nga themeluesi i një organizatë jofitimprurëse kundër trafikimit seksual të fëmijëve që po zhvillon projekte të ndryshme filmike, duke përfshirë një dokumentar, raporton AP.

Tim Ballard, producent dhe themelues i Operacionit Hekurudhor Underground, tha në atë kohë se Gibson kishte kërkuar ndihmën e organizatës për të tërhequr një duzinë jetimësh nga Ukraina gjatë pushtimit rus vitin e kaluar.

Në një paraqitje në janar në Forumin Konservator të Utah Eagle në Salt Lake City, ish-agjenti i Departamentit të Sigurisë Kombëtare, Ballard tha se ai e njihte Gibson sepse aktori ndihmoi në editimin e “The Sound of Freedom”, një film i planifikuar për Ballard dhe organizatën e tij që planifikohet të publikohet këtë verë.

Ballard tha se ai i kërkoi Gibson-it para për të filmuar përpjekjen e shpëtimit në Ukrainë dhe aktori ra dakord.

Ai tha “Nuk ka problem” dhe na ndihmoi të fillonim dhe regjistrimin. Katër muaj më vonë, ajo që mendova se mund të ishte një dokumentar për Ukrainën përfundon të jetë një seri dokumentarësh me katër pjesë që pothuajse ka përfunduar, tha Ballard.

Nierob nuk pranoi të komentonte për AP mbi vërejtjet e Ballard ose të shtjellonte lidhjet e Gibson me organizatën jofitimprurëse kundër trafikimit, por ai vuri në dukje se aktori “nuk po financon asnjë lloj dokumentari me shumë pjesë”.

Organizata me bazë në Utah është në mesin e një numri që ka gjetur sukses në vitet e fundit duke arkëtuar teoritë e konspiracionit që kanë dalë nga Q Anon, thekson AP.

Ballard, në një deklaratë për AP, tha se ai i qëndron “çdo fjale” në një video të janarit, në të cilën ai përshkroi rolin e Gibson në ndihmën për shpëtimin e fëmijëve në rrezik trafikimi në Ukrainën e shkatërruar nga lufta.

Por ai gjithashtu pranoi se aktori nuk është i përfshirë në realizimin e dokumentarit të ardhshëm, për të cilin ai tha se po prodhohet nga Nick Nanton i DNA Films dhe një numër të tjerëve që shërbejnë si producentë ekzekutiv.

Nuk është hera e parë që emri i Mel Gibson lidhet me teoritë konspirative të përhapura nga mbështetësit e Q anon. Vërtetmatësi tashmë ka shkruar për këtë temë.

Nga të gjitha faktet më sipër mund të konkludojmë se Mel Gibson nuk është duke filmuar asnjë dokumentar për trafikimin seksual të fëmijëve. Themeluesi i një organizatë jofitimprurëse kundër trafikimit në Utah sugjeroi më parë se aktori do të ofronte mbështetjen fillestare për një dokumentar, por ai konfirmoi për Associated Press se Gibson nuk ishte i përfshirë në krijimin e filmit.

Prandaj, ne e vlerësojmë postimin që po shqyrtojmë si të pavërtetë.

 

Ky artikull është përgatitur në kuadër të projektit Promovimi i qasjes në lajme të besueshme për të luftuar dezinformatat, i zbatuar nga Fondacioni Metamorfozis. Artikulli, i botuar fillimisht në Vërtetmatës, është mundësuar nga mbështetja e fondacionit jofitimprurës amerikan NED (National Endowment for Democracy). Përmbajtja e këtij artikulli është përgjegjësi e autorit dhe nuk pasqyron domosdoshmërisht pikëpamjet e Metamorphosis, NED ose bashkëpunëtorëve të tyre

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari