Lufta e Gazës dhe viktimat e saj të keqpërdorura në teoritë konspirative Q anon

Postimi përhap teorinë e njohur të konspiracionit për elitat që kontrollojnë botën, adhurojnë Satanin dhe tregtojnë fëmijë që i vrasin për të pirë gjakun e tyre, por këtë herë komploti përfshin luftën në Gaza. Kjo teori konspirative shtyhet veçanërisht nga mbështetësit e QAnon që lavdërojnë Trumpin dhe pas luftës në Ukrainë dhe Putin, duke i paraqitur ata si një lloj heronjsh dhe shpëtimtarësh. Ndryshe nga sa pretendon postimi, nuk ka asnjë elitë të fshehtë që drejton 13 familjet që vrasin fëmijë të ndikuar nga Vatikani. Nuk ka tunele sekrete apo fëmijë të rrëmbyer që vetëm Trump dhe Putin mund t’i shpëtojnë. Lufta në Gaza është një realitet, ka marrë qindra jetë dhe është jashtëzakonisht e pakëndshme ta lidhësh atë me teori konspirative.

.

Ne analizojmë një postim në Facebook që përhap teorinë e njohur konspirative se një shoqëri sekrete e elitave që adhurojnë Satanain, trafikojnë fëmijë kontrollojnë botën dhe ish-presidenti i SHBA Donald Trump dhe presidenti rus Vladimir Putin po luftojnë kundër tyre. Në këtë mënyrë abuzohet me luftën në Gaza.

22.10.2023

Jo, luftëra.
Sekreti i Satanait është gjaku i foshnjave tona.
Paraja është vetëm një mjet për luftëra.
Luciferi dëshiron fëmija juaj dhe ju të vdisni.
Vatikani është strofka e Luciferit dhe 13 familjeve nën të dhe gjithë të tjerat nën to.
Trump dhe Putin po luftojnë për ne..dhe disa të tjerë…i gjithë planeti është i lidhur me tunele…për trafikimin e fëmijëve.
Gaza ..është një kamp i hapur përqendrimi ..ku vriten fëmijë, gra dhe burra në natyrë.

Postimi përhap një teori konspirative rreth elitave që kontrollojnë botën, adhurojnë Satanin dhe tregtojnë fëmijë që i vrasin për të pirë gjakun e tyre. Shpesh përmendet Vatikani, anëtarët e shquar të të cilit besohet se janë pjesë e Iluminatit. Kjo teori konspirative shtyhet veçanërisht nga mbështetësit e QAnon që lavdërojnë Trumpin dhe pas luftës në Ukrainë dhe Putinit, duke i paraqitur ata si një lloj heronjsh dhe shpëtimtarësh.

Q Anon është një nga teoritë konspirative më të përhapura për të tërhequr vëmendjen në vitet e fundit. Anëtarët e lëvizjes Q Anon përhapën gjithashtu teorinë e adrenokromit dhe thonë se Presidenti Trump po bën një luftë të fshehtë kundër pedofilëve të elitës që adhurojnë Satanain në Qeveri, biznes dhe media. Kjo teori konspirative pretendon se politikanët e shtetit të thellë dhe elita e Hollivudit janë të përfshirë në një rrjet të madh rrëmbimi të fëmijëve që mbledh përbërjen kimike adrenokromin nga fëmijët e abuzuar seksualisht që i nënshtrohen ritualeve satanike.

Ndryshe nga ky pretendim, asnjë studim shkencor, provë klinike apo agjenci zyrtare shëndetësore nuk e ka lidhur adrenokromin me rinovimin. Nuk ka asnjë provë që kjo substancë përdoret për përtëritje dhe as që ka efekt halucinogjen. Edhe pse nuk është vërtetuar asnjëherë me prova se ka ndonjë praktikë të nxjerrjes së adrenokromit nga fëmijët, rrëfimi nuk ndalet së qarkulluari në rrjetet sociale.

Teoria e konspiracionit Q Anon është e gjerë, e ndërlikuar dhe gjithnjë në ndryshim dhe përkrahësit e saj vazhdimisht gërshetojnë ngjarje dhe personalitete të reja në narrativën e saj kryesore. Por në fund të fundit është se demokratët kombëtarë, të ndihmuar nga Hollivudi dhe një grup “elitash globale”, drejtojnë një rrjet masiv kushtuar rrëmbimit, trafikimit, torturës, abuzimit seksual dhe kanibalizimit të fëmijëve, të gjitha për të përmbushur ritualet e besimin e tyre satanik. Donald Trump, sipas kësaj fantazie, është i vetmi person i gatshëm dhe i aftë të nisë një sulm kundër tyre, shkruan Guardian në analizën e tij për komplotistët Q anon që besojnë në një rrjet të madh pedofilësh.

Teoria se Trump po shpëtonte fëmijët nga trafikimi i qenieve njerëzore dhe një lloj rrjeti pedofilësh është e njohur dhe po përhapet nga mbështetësit e tij, anëtarë të lëvizjes QAnon, siç është profili i personit që ndan këtë postim.

Ata që përhapin teorinë e konspiracionit se Trump është një lloj shëruesi fëmijësh, nuk kanë ofruar kurrë ndonjë provë të fortë për këtë. Vërtetmatës shkroi për këtë teori që tre vite më parë, kur u publikua lajmi për 100,000 fëmijë të abuzuar në Nju Jork, të shpëtuar nga kthetrat e satanistëve pedofilë, që dyshohet se ishin të lidhur me ish-sekretaren e Shtetit të SHBA-së dhe ish-Zonjën e Parë Hillary Clinton. Pasi skandali i Pizzagate i vitit 2016 u qetësua dhe çështja e magnatit të akuzuar financiar amerikan Jeffrey Epstein përfundoi kur ai vrau veten në qelinë e tij të burgut në Nju Jork, ku ishte në pritje të gjykimit për akuzat e reja të organizimit të prostitucionit të mitur,Q anon ka marrë përsipër narrativën e lidhjes politike liberale të Amerikës, Hollivudit dhe elitës së biznesit me pedofilinë dhe satanizmin dhe Trump paraqitet si shpëtimtari i madh i fëmijëve nga kthetrat e së keqes.

Përkrahësit e kësaj teorie konspirative, përveç Trumpit, lavdërojnë edhe Putinin, i cili pas fillimit të luftës në Ukrainë, paraqitet si shpëtimtari i fëmijëve ukrainas nga trafikimi i organeve. Për këtë temë ka shkruar edhe Vërtetmatës.

Në këtë kontekst, postimi abuzon me luftën në Gaza, duke theksuar se bëhet fjalë për një “kamp të hapur përqendrimi “…ku fëmijë, gra dhe burra vriten hapur”. Nuk është sekret se forcat izraelite, në fushatën e tyre hakmarrëse pas sulmit të Hamasit më 7 tetor, vranë qindra civilë në Gaza, përfshirë fëmijë. Agjencia e Kombeve të Bashkuara për Fëmijët (UNICEF) ka dënuar numrin “e pabesueshëm” të viktimave fëmijë në Gaza, ku raportet zyrtare thonë se bombardimet izraelite kanë vrarë mijëra njerëz. Duke raportuar se 2,360 fëmijë janë vrarë në më pak se tre javë, UNICEF bëri thirrje për një armëpushim të menjëhershëm dhe akses të vazhdueshëm dhe të papenguar në ndihma humanitare.

Prandaj, lufta në Gaza nuk mund të lidhet me disa elita sekrete, tunele nëntokësore dhe teori konspirative, sipas të cilave fëmijët vriten në emër të Satanit dhe Luciferit.

I gjithë postimi është konfuz, duke thënë gjëra që nuk mbështeten me asnjë provë. Postimi përhap teori të njohura konspirative për të cilat Vërtetmatësi ka shkruar në shumë raste. Nuk ka asnjë elitë të fshehtë që drejton 13 familjet që vrasin fëmijë të ndikuar nga Vatikani. Nuk ka tunele sekrete apo fëmijë të rrëmbyer që vetëm Trump dhe Putin mund t’i shpëtojnë. Lufta në Gaza është një realitet, ka marrë qindra jetë dhe nuk është e drejtë të lidhet me teori konspirative. Për shkak të gjithë kësaj, ne e vlerësojmë postimin që po analizojmë si të pasaktë.

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari