Tridenti nuk është simbol nazist, por pjesë e historisë së Ukrainës

Tërheqja e një paraleleje mes Zelenskit dhe Hitlerit është një manipulim klasik në frymën e propagandës ruse. E gjithë kjo është bërë për të justifikuar agresionin rus kundër Ukrainës sovrane që ka më shumë se një vit. Zelensky është hebre dhe gjyshi i tij dhe tre nga vëllezërit e tij luftuan kundër nazistëve. Si kujtesë, Ukraina e ndaloi promovimin e nazizmit në vitin 2015.

Një postim në rrjetin social Facebook ka shpërndarë një kolazh fotografish që i shtyn lexuesit të mendojnë se presidenti i Ukrainës, Voldomir Zelensky, është nazist dhe vetë postimi pretendon se ai është nipi i Hitlerit. Kjo nuk është e vërtetë.

 

Ata që brohorasin për ukrainasit, më lejoni t’u them vetëm se po brohorasin për nipin e Hitlerit.

Dhe ti Bartolomeu, nuk mund të të bëj të qash…

Kaq, thuhet në postim.

Postimi ndan një kolazh me dy foto, njëra poshtë tjetrës. Fotografia më sipër është nga takimi i presidentit ukrainas Voldomir Zelensky dhe Patriarkut Ekumenik Bartolomeu kur pak ditë më parë ata u lutën së bashku në Stamboll për viktimat e luftës me Rusinë në Katedralen Patriarkale të Shën Gjergjit në Fener. Emblema në bluzën e Zelenskit është e rrethuar në foto. Bëhet fjalë për stemën e Ukrainës – një trendësh, e cila ka një histori të gjatë, por në të njëjtën kohë, është simbol i një vendi modern. Ai pasqyron ngjarjet heroike të së kaluarës – dhe luftëtarët ukrainas që mbrojnë sot sovranitetin dhe integritetin territorial të Ukrainës.

Në foton e dytë, e cila është bardh e zi, pranë svastikës, shihet një burrë duke valëvitur një flamur me një simbol që i ngjan një figure trekëndore. Kërkimi i fotografisë nuk jep rezultate specifike se kur dhe në çfarë konteksti është bërë, dhe nëse është reale apo e bërë me ndihmën e një mjeti të inteligjencës artificiale. Ajo që dihet është se simboli i nazizmit është svastika dhe ishte emblema e tyre zyrtare. Ajo u shfaq në flamujt e tyre, uniformat dhe materialet e tjera propagandistike. Simboli i svastikës rrjedh nga kontekstet e lashta fetare dhe kulturore, por fatkeqësisht u përvetësua nga nazistët dhe që atëherë është lidhur gjerësisht me ideologjinë e tyre të urrejtjes dhe diskriminimit.

Trekëndori, nga ana tjetër, ka qenë prej kohësh i lidhur me historinë e Ukrainës. Ishte një shenjë e paraardhësve të dinastisë Rurik (shek. 10-12, koha e Kievan Rus). Arkeologët e gjejnë ende imazhin e tij në monedha, vula, vegla, tulla, murale. Në vitin 1918, menjëherë pas rënies së Perandorisë Ruse, qeveria e Republikës Popullore të Ukrainës miratoi treshen si stemë shtetërore.

Që nga ditët e Republikës Popullore të Ukrainës, tridenti (tryzub) është bërë një simbol i rëndësishëm për ata që luftuan për pavarësinë e Ukrainës 100 vjet më parë dhe ata që e mbrojnë atë tani..

Zelenski ka origjinë hebreje

Në tekstin e njoftimit po ashtu pretendohet rrejshëm se Zelenski është nipi i Hitlerit. Nuk ka absolutisht asnjë provë për këtë pretendim. Nuk ka asnjë dokument të shkruar që mund ta konfirmojë këtë. Narrativa e lidhjes së Zelenskit me Hitlerin filloi nga Ministri i Jashtëm rus Sergei Lavrov kur ai shkaktoi një grindje diplomatike me Izraelin vitin e kaluar pasi ai pretendoi se “Hitleri kishte gjithashtu gjak hebre” dhe se “disa nga antisemitët më të këqij janë hebrenj” në një përpjekje për të konfirmuar përpjekjet e supozuara të Moskës për të “denazifikuar” Ukrainën.

Por historia e Zelensky është krejtësisht e ndryshme nga këto pretendime gjithëpërfshirëse. Ai është hebre dhe gjyshi i tij dhe tre vëllezërit e tij luftuan kundër nazistëve, një detaj që ai e theksoi në një fjalim duke iu drejtuar drejtpërdrejt popullit rus më 24 shkurt 2022. Duke paraqitur historinë e tij familjare, ai iu përgjigj pretendimeve të presidentit rus Vladimir Putin se Rusia do të “denacilizonte” Ukrainën.

Ata thonë se ne jemi nazist. Por si mundet një popull që humbi 8 milionë jetë për të mposhtur nazistët të mbështesë nazizmin? Si mund të jem nazist? Tregoja këtë gjyshit tim, i cili luftoi në Luftën e Dytë Botërore si këmbësor sovjetik dhe vdiq si kolonel në Ukrainën e pavarur. Ata ju thonë se ne e urrejmë kulturën ruse. Si mund të urrejë dikush një kulturë? Ndonjë kulturë? Fqinjët gjithmonë pasurojnë kulturën e njëri-tjetrit, tha Zelenski.

Në janar 2020, gjatë përkujtimit në Izrael të 75-vjetorit të çlirimit të Aushvicit, Zelensky i tregoi kryeministrit izraelit Benjamin Netanyahu historinë familjare të gjyshit të tij dhe tre vëllezërve të tij.

Tre prej tyre, prindërit dhe familjet e tyre ishin viktima të Holokaustit. Të gjithë u pushkatuan nga pushtuesit gjermanë që pushtuan Ukrainën. Një vëlla i katërt mbijetoi. … Dy vjet pas luftës ai kishte një djalë dhe në 31 vjet kishte një nip. Në 40 vjet të tjera ai nip u bë president dhe sot qëndron para jush zoti kryeministër, tha Zelenski.

Nuk është hera e parë që në rrjetet sociale shpërndahen narrativa se Ukraina është naziste dhe fashiste, se atje lavdërohet nazizmi (neo-nazizmi) dhe se Zelensky është nazist. E gjithë kjo është bërë për të justifikuar agresionin rus kundër këtij vendi sovran që ka më shumë se një vit. Si kujtesë, Ukraina e ndaloi promovimin e nazizmit në vitin 2015.

Tërheqja e një paraleleje mes Zelenskit dhe Hitlerit është një spin klasik dhe është në frymën e propagandës ruse. Për shkak të të gjitha fakteve të deklaruara konkludojmë se ky postim është i rremë.

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari