Propaganda ruse po përhap edhe një herë panik për një grusht shteti të dyshuar në Ukrainë

Në rajon qarkullojnë sërish zëra se shërbimet speciale ukrainase janë të pakënaqur me udhëheqjen e re të ushtrisë ukrainase dhe po “përgatisin” një grusht shteti. Si më parë, dezinformata vjen nga agjencia shtetërore ruse “RIA Novosti”, por këtë herë burimi kryesor janë mesazhet zanore të një anëtari të një grupi sekret Telegram. Autenticiteti i mesazheve zanore të regjistruara nuk mund të verifikohet, as identiteti i dërguesit. 

 

Shkruan: Matej Trojacanec

 

Agjencia shtetërore ruse RIA Novosti, një burim i njohur dezinformimi dhe propagande, po mbjell sërish frikë. Kësaj radhe thonë se njësitë elitare të forcave të armatosura ukrainase po përgatisin një grusht shteti kundër presidentit të tyre Volodymyr Zelensky, sepse nuk ishin të kënaqur me ndryshimet në krye të ushtrisë, pikërisht për shkak të shkarkimit të kreut të forcave ushtarake ukrainase, Valery Zaluzhny. 

Specialistët tanë fituan qasje në një burim në të cilin komunikojnë përfaqësues të njësive të ndryshme elitare të armikut, si marinsat, forcat speciale, inteligjenca, forcat speciale të SBU [Shërbimi i Sigurisë së Ukrainës], si dhe batalione të ndryshme nacionaliste. Fjala është për specialistë të kualifikuar, të cilët janë dukshëm të pakënaqur me ndryshimin e komandës. Ata janë duke diskutuar seriozisht opsionet për përmbysjen e qeverisë aktuale dhe komandën e forcave të armatosura të Ukrainës, transmeton RIA Novosti.

Më pas, një mori mediash nga rajoni e morën shpejt tekstin – Serbia (1, 2, 3), BeH, Bullgaria (1, 2, 3), por edhe në vende të tjera. Në disa nga titujt lexohen:

E FORTË! Spiunët rusë paralajmëruan urgjentisht Zelenskyn! Një grusht shteti ushtarak mund të nisë në çdo moment, dikush një milion herë më i keq vjen në pushtet?!

Sputnik mëson: Ushtria ukrainase po shqyrton mundësinë e rrëzimit të Zelensky

PËRGATITJA E GRUSHTIT ? Njësitë elitare të Ukrainës rrëzojnë Zelenskyn

Nuk ka asnjë njoftim zyrtar nga pala ukrainase për një lajm të tillë dhe as ndonjë reagim. Kjo është kështu, ndoshta sepse kjo nuk është hera e parë që përhapet paniku që po përgatitet një “grusht shteti” kundër Zelenskit.

Sipas një raporti të RIA Novosti, shërbimet speciale ruse kanë fituar akses në një grup Telegram ku mund të dëgjohen mesazhet zanore nga një anëtar i grupit. Sipas Sputnik, zëri thuhet të jetë Maxim Shevtsov, komandant i grupit të inteligjencës të Brigadës së 80-të të Sulmit Ajror të Veçantë të Ukrainës:

Nëse populli nuk del në mbrojtje të Zaluzhnit, nëse ushtria nuk del në mbrojtje të Zaluzhnit, atëherë ky mi [Zelensky] do t’i silurojë [zjarrojë] të gjithë… Le ta shkatërrojmë këtë mi të gjelbër dhe ta instalojmë Zaluzhny! Në fakt, është Zelensky ai që duhet të zëvendësohet, jo Zaluzhny. Ky mi mendon se ai ka një vlerësim zero dhe Zaluzhny ka një vlerësim më të lartë dhe [kjo është arsyeja pse Zelensky] po përpiqet ta menjanojë atë, mund ta dëgjoni nga audio regjistrimi .

Duhet theksuar se mesazhet janë dërguar nga një anëtar i grupit, që nuk mund të verifikohet vërtetësia e mesazheve zanore të regjistruara, apo identiteti i personit që i ka dërguar. Gjithashtu, pakënaqësia e një ushtari nuk është dëshmi se ekziston një plan veprimi për të kryer një grusht shteti.

Një (de)informacion i tillë nuk është asgjë e re. Sa herë që del fjala se ka pikëpamje të ndryshme për një çështje brenda udhëheqjes ukrainase, media spekulon se kjo do të jetë pika e fundit dhe një grusht shteti do të pasojë.

Kështu, në shkurt portali serb “Srbija Javlja” njoftoi:

Zelenski bëri një gabim fatal: Kërcënohet me grusht shtet!

Në nëntor të vitit të kaluar Vecer.mk ndau lajmin:

Ushtria PO PËRGATIT GRUSHT KUNDËR ZELENSKIT, i shkruhet e zeza?!

Verën e kaluar (21.08.2023), portali serb “Pravda” njoftoi:

Grusht shteti në ushtrinë e Ukrainës real? Zelenski bëri një lëvizje që do t’i kushtojë shtrenjtë

Pranverën e kaluar (6 mars 2023), portali maqedonas Infomax publikoi një tekst me titull:

A kërcënohet Zelenski me një grusht shteti ushtarak? Në konflikt me Zaluzhny për Bakhmut!’

Duke lexuar vetëm titujt e këtyre lajmeve, të krijohet përshtypja se në udhëheqjen ukrainase ka tensione kaq të tmerrshme, dhe gjithçka mund të “plas”. Por nëse i lexoni vetë tekstet, do të kuptoni se ato janë kryesisht postime ose analiza të shkarkuara nga burime të dyshimta dhe kanë tituj të klikimeve.

Çfarë i parapriu këtij “grushti shteti”?

Si gjithmonë me lajme të tilla që synojnë të ngjallin panik dhe të mbjellin frikë, veçanërisht tek ukrainasit, pyetja është se çfarë i parapriu dhe çfarë shihet në një kontekst më të gjerë?

Në këtë kuptim, performanca e javës së kaluar e presidentit francez Emmanuel Macron, i cili theksoi se “nuk ka kufij” për mbështetjen franceze për Ukrainën, është e rëndësishme. E cila kulmoi me nënshkrimin e një marrëveshjeje midis Francës dhe Ukrainës për mbështetje dhe siguri afatgjatë.

Gjithashtu, presidenti ukrainas Zelenski dhe ministri i Mbrojtjes Rustem Umerov kanë zhvilluar një vizitë zyrtare në Turqi. Gjatë vizitës, siç shkruan MIA, presidenti i Turqisë, Rexhep Tajip Erdogan, me homologun e tij ukrainas, ndër të tjera ka diskutuar edhe për “Marrëveshjen për korridorin e eksportit të grurit dhe kërkimin e paqes së përhershme në rajon”. Sipas të përditshmes së njohur franceze Le Monde, Zelenski vizitoi edhe kantierin detar të Tuzlës, ku janë ndërtuar anije të tipit Corvette për Marinën e Ukrainës.

Pa dyshim, të dyja ngjarjet janë domethënëse për Ukrainën, duke pasur parasysh se dy vjet pas fillimit të konfliktit, ushtria ukrainase po përballet me një mungesë serioze municionesh dhe të ashtuquajturën “Lodhja e Ukrainës”, mungesa e vullnetit midis disa vendeve për të vazhduar ndihmën financiare për Ukrainën. Por edhe “lodhja” e qytetarëve në vendet evropiane, pasi migrantët ukrainas u ofrohen ndihma sociale, strehim dhe vende të reja pune në një kohë inflacioni të lartë dhe papunësie në popullatën e tyre të përgjithshme.

Një presion shtesë dhe domethënës është se ka një ngërç në Kongresin e SHBA lidhur me ndihmën financiare për Ukrainën. Besohet se ky do të jetë vetëm një prelud i një skenari të mundshëm të zgjedhjeve presidenciale të këtij viti në Shtetet e Bashkuara. Siç tha presidenti hungarez Viktor Orbán pas takimit me ish-presidentin amerikan Donald Trump: 

Ai [Trump] nuk do t’i japë asnjë monedhë për luftën Ukrainë-Rusi. Prandaj, lufta do të përfundojë, sepse është e qartë se Ukraina nuk mund të qëndrojë në këmbët e veta.

 

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari