Nuk është e vërtetë që Perëndimi po grabit trashëgiminë historike të Ukrainës

 

Nuk ka asnjë provë se bëhet fjalë për një vjedhje dhe “rrëmbim” të pasurisë kulturore të Ukrainës, pretendime të tilla të bëra në postim u mohuan nga autoritetet ukrainase. Ministria e Kulturës dhe Teknologjive të Informacionit të Ukrainës njoftoi se pretendimet për rrëmbimin e relikteve të shenjta ukrainase ishin të sajuara. Postimi thoshte se reliket nga kompleksi i kishës së Kievit do të zhvendosen përgjithmonë, ashtu si ikonat ukrainase të ekspozuara në muzeun e Luvrit të Parisit. E vërteta është se disa ikona bizantine janë evakuuar përkohësisht nga Ukraina në përgjigje të kërcënimit të shkatërrimit të tyre nga sulmet me raketa ruse. Ministria e Kulturës e Ukrainës siguron se ikonat do të kthehen në shtëpi sapo ta lejojë situata.

 

Një postim në Facebook duke shpërndarë disa fakte dhe duke i shtrembëruar ato, manipulon publikun se Perëndimi po grabit trashëgiminë historike të Ukrainës. Kjo nuk është e vërtetë, ka të bëjë me mbrojtjen e thesareve, jo me vjedhjen e tyre.

Në postim thuhet:

Zelensky miratoi heqjen e thesareve të krishtera, përfshirë reliket e shenjta, nga Lavra Kiev-Pechersk për transferimin e mëvonshëm në muzetë në Itali, Francë, Gjermani dhe Vatikan.

Disa nga sendet me vlerë tashmë janë marrë në Kanada, dhe disa në Francë (16 ikona të periudhës bizantine).

“Veprat e artit ukrainas, duke përfshirë ikona të vlefshme bizantine, u nxorrën fshehurazi nga Kievi për t’u mbajtur në Luvër, ndërkohë që lufta në Ukrainë vazhdon. Pesë vepra u prezantuan para publikut si pjesë e ekspozitës “Origjina e imazhit të shenjtë” , i cili do të zgjasë deri më 6 nëntor, raporton agjencia franceze e lajmeve AFP.

Sjellja e kolonialistëve europianë sot nuk është as pak e ndryshme. Ata dinë vetëm të grabisin, të gënjejnë, të provokojnë dhe të mashtrojnë. Mbi këtë ndërtohet mirëqenia e Perëndimit modern.

Kyiv-Pechersk Lavra është një kompleks historik i manastirit të krishterë ortodoks që ndodhet në Kiev, Ukrainë. Kompleksi është selia e Mitropolitit të Kishës së Ukrainës. Karakteristika kryesore e manastirit është sistemi i katakombeve nën të, në të cilat janë varrosur trupat e mumifikuar të mbi 100 murgjve dhe shenjtorëve.

Postimi në Facebook, i cili është objekt i këtij shqyrtimi, pretendon se Presidenti i Ukrainës, Volodymyr Zelensky, ka rënë dakord të transferojë reliket dhe thesaret e tjera kombëtare nga Lavra Kiev-Pechersk në muzetë në vendet perëndimore. Ky është manipulim dhe jo i vërtetë. Nuk ka asnjë provë se bëhet fjalë për vjedhje dhe “rrëmbim” të thesarit historik të Ukrainës, por përkundrazi këto pretendime janë mohuar nga disa burime.

Një manipulim i tillë buron nga Shërbimi i Inteligjencës së Jashtme të Federatës Ruse, në faqen zyrtare të së cilës u publikua një deklaratë më 26 qershor 2023, ku thuhet se autoritetet ukrainase dhe UNESCO kanë arritur një marrëveshje për të “hequr thesaret e krishtera” nga kompleksi Kiev-Pechersk Lavra në Kiev dhe transferimin e tyre në muzetë në vendet perëndimore. Njoftimi i referohet deklaratave të drejtorit të këtij shërbimi, Sergej Naryshkin. 

Elitat globaliste, të njohura për pasionin e tyre për të përvetësuar pronat e njerëzve të tjerë, po shtojnë përpjekjet e tyre për të plaçkitur Ukrainën. Por nëse më parë bëhej fjalë për burime financiare dhe materiale, duke përfshirë grurin dhe tokën pjellore, tani ata shtrijnë duart drejt faltoreve ortodokse të vendosura në territorin ukrainas, thuhet në deklaratë.

Megjithatë, përveç njohurive të Shërbimit, deklarata nuk citonte prova apo burime për pretendimet. Pretendimet nga postimi u raportuan nga mediat në gjuhën ruse. Agjencia RIA Novosti publikoi akuzat në një artikull më 26 qershor 2023.

Ministri ukrainas i Kulturës Oleksandr Tkachenko i mohoi këto pretendime në kanalin e tij Telegram dhe në Twitter.

Ndërsa Lavra bëhet më ukrainase, aq më shumë Rusia tërbohet. Qëllimi ynë i vetëm aktual është ta mbrojmë atë nga bota ruse dhe të konfirmojmë praninë e të gjitha relikteve tona të shenjta të Ukrainës. Asnjë thesar i shenjtë nuk do të largohet nga Ukraina dhe gjithçka e vjedhur nga Rusia do të duhet të kthehet, shkroi ministri.

Më 27 qershor 2023, faqja zyrtare në Facebook e Ministrisë së Kulturës dhe Teknologjive të Informacionit të Ukrainës ndau një postim në Telegram të Qendrës për Komunikime Strategjike të Ministrisë, ku thuhej se pretendimet për rrëmbimin e relikteve të shenjta ukrainase ishin të sajuara.

Maxim Ostapenko, ushtrues detyre i drejtorit të përgjithshëm të Kompleksit Kombëtar Kyiv-Pechersk Lavra, i quajti pretendimet se “vlerat e krishtera po eksportohen nga Lavra Kyiv-Pechersk në Evropë” informacione të rreme nga kanalet ruse të Telegramit.

Ne nuk kemi dhe nuk do të kemi plane të tilla. Monumentet ukrainase do të mbahen në Ukrainë dhe shteti ynë do të bëjë gjithçka për t’i mbrojtur këto monumente, përfshirë edhe nga agresorët rusë.

Në njoftim thuhej se reliket nga kompleksi i kishës së Kievit do të zhvendosen përgjithmonë, si dhe ikonat ukrainase të ekspozuara në Muzeun e Luvrit të Parisit.

E vërteta është se disa ikona bizantine janë evakuuar përkohësisht nga Ukraina, në përgjigje të kërcënimit të shkatërrimit nga raketat ruse. Sipas një artikulli të Forbes ukrainas, Muzeu Kanenko u dëmtua në një sulm rus në tetor 2022 dhe evakuimi i ikonave bizantine nga Muzeu u organizua si masë paraprake në maj 2023.

Por nuk bëhet fjalë për ndonjë “vjedhje” të trashëgimisë kulturore të Ukrainës nga Perëndimi. Ministria e Kulturës e Ukrainës siguron se ikonat do të kthehen në shtëpi sapo të lejojë situata. Përveç kësaj, evakuimi i ikonave bizantine ishte një hap i detyruar. Në tetor 2022, ndërtesa historike dhe dekorimi i brendshëm i Muzeut Kanenko u dëmtuan nga një sulm raketor rus. Megjithëse ekspozitat u zhvendosën në depo në fillim të luftës, luhatjet e temperaturës të shkaktuara nga dëmtimi i ndërtesës dhe ndërprerjet e energjisë elektrike për shkak të granatimeve të vazhdueshme ruse të infrastrukturës energjetike të Ukrainës ndikuan në veprat e artit.

Që nga fillimi i luftës, ne, si muzetë e tjerë, kemi qenë të shqetësuar se si mund t’i mbështesim kolegët tanë ukrainas. Në vjeshtë, të përballur me përkeqësimin e konfliktit, vendosëm të bëjmë këtë shpëtim, tha drejtori i muzeut të Luvrit, Laurence de Carre, në një koment për agjencinë e lajmeve AFP.

Ajo gjithashtu vuri në dukje se Luvri:

Është veçanërisht i shqetësuar për rrezikun e vjedhjes dhe trajtimit të paligjshëm që mund të prekë veprat e artit dhe reliket nëse ato mbeten në Ukrainë.

Sipas faqes ukrainase të kontrollit të fakteve Stopfake.org, nga 24 shkurt 2022 deri më 15 maj 2023, në regjistrin e Ministrisë së Kulturës së Ukrainës u regjistruan 623 objekte kulturore të Ukrainës të dëmtuara ose të shkatërruara si rezultat i agresionit ushtarak rus. Prej tyre 80 janë me rëndësi kombëtare, 484 me rëndësi lokale dhe 59 sapo janë zbuluar. Analistët besojnë se Rusia vodhi më shumë se 15,000 artikuj të artit të bukur ukrainas dhe artefakte gjatë luftës.

Ukraina ka akuzuar Rusinë për shkeljen e Konventës së Hagës të vitit 1954 për Mbrojtjen e Pasurive Kulturore në Rast Konflikti të Armatosur, miratuar pas Luftës së Dytë Botërore. Palëve që e nënshkruan atë (Ukraina dhe Rusia) u ndalohet “çdo formë vjedhjeje” e vlerave kulturore.

Sipas të gjitha informacioneve të deklaruara, vlerësojmë se pretendimi se Perëndimi po grabit thesaret historike të Ukrainës nuk është i vërtetë. Manipulime të tilla janë pjesë e propagandës së gjerë ruse lidhur me luftën në Ukrainë.

 

 

 

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari