Videoja e pritjes së Putinit në Emiratet e Bashkuara Arabe është publikuar në disa media botërore
Videoja e pritjes së presidentit rus Vladimir Putin në Emiratet e Bashkuara Arabe është transmetuar në disa media botërore, si Telegraph, Sky News, France 24, CNN, që do të thotë se nuk është ndaluar transmetimi, siç pretendohet në postimin që ne analizojmë.
Ne po analizojmë një postim në Facebook ku shpërndahet një video e mirëseardhjes së presidentit rus Vladimir Putin në Abu Dhabi, duke pretenduar se video nuk duhej të shfaqej në demokracitë perëndimore.
Kjo video nuk duhet të transmetohet në vendet më demokratike perëndimore për të mos krahasuar pritjen e Putinit me pritjet e presidentëve perëndimorë. Epo, tani të shohim nëse këta bastardë do ta heqin për shkak të të drejtës së autorit, thuhet në postim.
Kjo nuk është e vërtetë. Vërtetmatësi ka shqyrtuar disa nga raportimet e mediave perëndimore që raportojnë për vizitën e Putinit në Emiratet e Bashkuara Arabe dhe është e qartë se video është transmetuar.
Presidenti rus, i cili ka qenë kryesisht i izoluar që nga lufta në Ukrainë, u prit me bujë. Ai kërkohet për rrëmbimin e fëmijëve në Ukrainë nga Gjykata Penale Ndërkombëtare, nënshkrues i së cilës nuk janë Emiratet e Bashkuara Arabe, shkruan Telegrafi britanik për vizitën e Putinit në Emiratet e Bashkuara Arabe.
Një roje nderi ishte vendosur në të dy anët e shtegut që të çon në pallat. Gjysma e burrave të armatosur të veshur me rroba tradicionale ishin mbi kuaj arabë dhe gjysma tjetër mbi deve, të gjithë me flamuj të Rusisë ose të Emirateve të Bashkuara Arabe, transmeton Telegrafi.
Ndërsa Putini hyri në kompleksin e pallatit, shtatë aeroplanë luftarakë fluturuan sipër dhe pas tyre u shfaqën ngjyrat e bardha, blu dhe të kuqe të flamurit rus. Tri ngjyrat vareshin mbi horizontin e Abu Dhabit, ndërsa shpërthimet e të shtënave lajmëronin ardhjen e Putinit, shkruan Telegraph, i cili transmeton edhe videon e pritjes së Putinit.
Videon mund ta shihni edhe në kanalin e Telegrafit në YouTube.
Për vizitën e Putinit në Emiratet e Bashkuara Arabe dhe pritjen e tij ka raportuar edhe kanali televiziv britanik Sky News, i cili, ashtu si Telegrafi, ka transmetuar videon ku shihet se avionët luftarakë lëshojnë ngjyra të ngjashme me ato të flamurit rus.
Videon mund ta gjeni edhe në kanalin YouTube të France 24.
Presidenti rus Vladimir Putin zbarkoi në Emiratet e Bashkuara Arabe të mërkurën në një vizitë të rrallë jashtë ish-Bashkimit Sovjetik, teksa Moska kërkon të rikthehet në skenën globale. I izoluar nga Perëndimi për shkak të luftës në Ukrainë, Putini është duke u ballafaquar me aleatët në Lindjen e Mesme, ku do të diskutojë për naftën, tregtinë dhe konfliktin Izrael-Hamas, thuhet në përshkrimin e videos.
Videoja është transmetuar edhe nga CNN.
Presidenti rus Vladimir Putin tha se marrëdhëniet me Emiratet e Bashkuara Arabe janë në kulmin e të gjitha kohërave gjatë vizitës së tij të parë në Lindjen e Mesme që nga pushtimi i plotë i Ukrainës gati dy vjet më parë, sipas përshkrimit të tij në YouTube.
Nga e gjithë kjo mund të konstatojmë se video e pritjes së Putinit në Emiratet e Bashkuara Arabe është transmetuar në disa media botërore, si Telegraph, Sky News, France 24, CNN, që do të thotë se nuk ishte e ndaluar për transmetim, siç pretendohet në postimin që po analizojmë. Prandaj e vlerësojmë si të pasaktë.
Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari
