Nuk ka asnjë provë që Ukraina ka furnizuar Hamasin me armë
Duke iu referuar një deklarate zyrtare të Shërbimit Informativ të Mbrojtjes të Ukrainës, Ukrainska Pravda shkruan se Rusia po përgatitet të diskreditojë Ukrainën për të ndikuar në qëndrimin e aleatëve dhe furnizimin me armë perëndimore. Ekspertët e sigurisë u thonë kontrolluesve të huaj të fakteve se Ukraina është në një betejë ekzistenciale me Rusinë dhe nuk ka kuptim t’i shiten armë Hamasit.
Po shqyrtojmë një postim në rrjetin social Facebook ku shkruhet:
Armët perëndimore të dorëzuara në Ukrainë përfunduan në duart e Hamasit në Izrael. Sistemi amerikan TOW shkatërron tanket dhe helikopterët izraelitë. Arma ka dy skaje.
Ndryshe nga sa është paraqitur në postim, nuk ka asnjë provë që armët e dërguara nga vendet perëndimore në Ukrainë kanë përfunduar në duart e Hamasit dhe se me to po shkatërrohen tanket dhe helikopterët izraelitë.
Ukrainska Pravda shkruan se pushtuesit rusë u dorëzuan militantëve të Hamasit armë trofe të prodhuara nga SHBA-ja dhe BE-ja, të cilat i kapën gjatë armiqësive në Ukrainë.
Inteligjenca mbrojtëse e Ukrainës tha se Rusia po përgatitet të diskreditojë Ukrainën në mënyrë që të ndikojë në qëndrimin e aleatëve dhe furnizimin me armë perëndimore, raporton Ukrainska Pravda.
Media citon një deklaratë zyrtare nga Drejtoria kryesore e Inteligjencës e Ministrisë së Mbrojtjes së Ukrainës, e cila thotë:
Inteligjenca ruse po zhvillon një fushatë për të diskredituar Ukrainën në Lindjen e Mesme.
Shteti agresor Rusia po përdor sulmin terrorist të Hamasit ndaj Izraelit si një provokim të madh kundër Ukrainës.
Departamenti kryesor i inteligjencës i Ministrisë së Mbrojtjes së Ukrainës bën të ditur se pala ruse i ka dorëzuar tashmë terroristëve të Hamasit armët e kapura gjatë luftimeve në Ukrainë, pra armë trofe të prodhuara në SHBA dhe vendet e BE-së.
Hapi tjetër, sipas planit të rusëve, duhet të jenë akuzat e rreme se ushtria ukrainase u shet armë perëndimore terroristëve rregullisht.
Në kuadër të fushatës dezinformuese të Kremlinit, këto gënjeshtra duhet të jenë baza e një numri të madh “hetimesh” në mediat perëndimore.
Për bindje, shërbimet e inteligjencës ruse synojnë të përdorin komentet përkatëse të tradhtarit nga shërbimi kufitar ukrainas, togeri i lartë Ruslan Syrovoy, i cili së fundmi iku në Moskë.
Një tjetër provokim armiqësor synon diskreditimin e forcave të armatosura të Ukrainës dhe pezullimin e plotë të ndihmës ushtarake për vendin tonë nga partnerët perëndimorë, sipas njoftimit të Drejtorisë Kryesore të Inteligjencës së Ministrisë së Mbrojtjes së Ukrainës, publikuar më 9 tetor të këtij viti.
Duke i shtuar narrativës se armët perëndimore të destinuara për Ukrainën përfunduan në Hamas, u shpërnda një video që zyrtarët ukrainas thanë se ishte e pavërtetë. Në video, dikush që paraqitet si përfaqësues i grupit terrorist Hamas demonstron armë ukrainase dhe pretendon në arabisht se ishte Ukraina ajo që u shiti armë perëndimore terroristëve. Video zgjat vetëm 12 sekonda dhe ngre shumë dyshime.
Duhet të theksohet se, në fakt, ukrainasit nuk mund ta bënin këtë, sepse partnerët tanë perëndimorë monitorojnë nga afër armët dhe pajisjet ushtarake që na furnizojnë për të luftuar kundër agresorit rus. Me sa duket videoja është xhiruar me nxitim nga një prej mediave ruse. Në këtë mënyrë, rusët po përpiqen të justifikohen dhe të krijojnë iluzionin se nuk janë të përfshirë me terroristët e Hamasit. Epo, ne dimë për takime të zyrtarëve të lartë të Federatës Ruse me drejtues dhe anëtarë të organizatave terroriste. Terroristët kanë bashkëpunuar prej kohësh me terroristët, tha Qendra e Mediave Ushtarake, një platformë e koordinuar nga Ministria e Mbrojtjes e Ukrainës.
Washington Post, duke cituar burime të inteligjencës, raportoi se militantët e Hamasit kishin planifikuar sulmin e paparalajmëruar ndaj Izraelit për të paktën një vit, me mbështetjen kryesore nga aleatët iranianë të cilët ofruan trajnime ushtarake dhe ndihmë logjistike, si dhe dhjetëra milionë dollarë në armë.
Megjithëse roli i saktë i Iranit në dhunën e së shtunës mbetet i paqartë, sulmi pasqyron ambicien e kahershme të Teheranit për të rrethuar Izraelin me legjione luftëtarësh paraushtarakë të armatosur me sisteme armësh gjithnjë e më të sofistikuara të aftë për të goditur thellë në shtetin hebre. Hamasi, organizata militante palestineze me bazë në Gaza që udhëhoqi sulmin, ka ruajtur historikisht një shkallë pavarësie nga Teherani në krahasim me grupet e vërteta iraniane si Hezbollahu me bazë në Liban. Por në vitet e fundit, Hamasi ka përfituar nga infuzionet masive të parave iraniane, si dhe nga mbështetja teknike për prodhimin e raketave dhe dronëve me sisteme të avancuara, përveç trajnimit në taktikat ushtarake, disa prej të cilave janë zhvilluar në kampe jashtë Gazës, thonë strukturat zyrtare të inteligjencës për Washington Post.
Sasia e nevojshme e trajnimit, logjistikës, komunikimit, personelit dhe armëve ofron një “gjurmë të madhe”, tha për Washington Post ish-oficeri i lartë i operacioneve të CIA-s, i cili luajti një rol në luftën kundër terrorizmit në Lindjen e Mesme, Mark Polimeropulos.
Kjo gjithashtu tregon për përfshirjen iraniane, duke pasur parasysh kompleksitetin e sulmit, dhe nxjerr në pah një dështim kolosal të inteligjencës. Përdorimi i paragliderëve, që të kujton një sulm spektakolar të vitit 1987 në Frontin Popullor për Çlirimin e Palestinës në Izrael që vrau disa ushtarë, duhet të ketë kërkuar trajnim jashtë Gazës,tha Polimeropulos për The Washington Post.
Jonathan Feiner, zëvendës këshilltari për sigurinë kombëtare në Shtëpinë e Bardhë, tha në një intervistë për CBS News:
Ajo që mund të them pa dyshim është se Irani është kryesisht bashkëpunëtor në këto sulme. Irani ka qenë mbështetësi kryesor i Hamasit për dekada. Ata i pajisën me armë. Ata u siguruan atyre trajnime. Ata u dhanë atyre mbështetje financiare. Dhe kështu, për sa i përket bashkëpunimit të gjerë, ne jemi shumë të qartë për rolin e Iranit.
Siç shton artikulli i Washington Post, kreu i Hamasit Ismail Haniyeh pranoi në një intervistë vitin e kaluar se grupi i tij mori 70 milionë dollarë ndihmë ushtarake nga Irani. Sipas një raporti të Departamentit të Shtetit të vitit 2020, Irani u jep 100 milionë dollarë në vit grupeve terroriste palestineze, duke përfshirë Hamasin, Xhihadin Islamik Palestinez dhe Frontin Popullor për Çlirimin e Palestinës.
Zyrtarët aktualë dhe ish-zyrtarë të inteligjencës kanë konfirmuar se Irani po ofron asistencë teknike për Hamasin në prodhimin e më shumë se 4,000 raketave dhe dronëve të armatosur të lëshuar në Izrael që nga e shtuna. Disa militantë të Hamasit kanë marrë gjithashtu trajnime në taktika të avancuara ushtarake, duke përfshirë kampet libaneze të pajisura me këshilltarë teknikë të Hezbollahut.
Hamasi nuk do të ishte ai që është, politikisht, shoqërisht, fetarisht, si një entitet terrorist dhe ushtarak, pa mbështetjen financiare të Iranit, ofrimin e trajnimit dhe armëve nga Irani,tha Matthew Levitt, një ish-zyrtar i lartë në Departamentin e Shtetit me fokus në terrorizmit.
Kontrolluesit e fakteve të Lead Stories kanë hedhur poshtë dezinformatat e ngjashme me atë që po shqyrtojmë, sipas të cilit vetë Hamasi pranoi se Ukraina u kishte shitur atyre armë.
Tobias Bork, një ekspert i sigurisë në Lindjen e Mesme në Institutin Mbretëror të Shërbimeve të Bashkuara në Londër, thotë se Ukraina është në një betejë ekzistenciale me Rusinë dhe nuk ka kuptim t’i shesë armë Hamasit.
Hamasi ka vetëm një përkrahës dhe ai është Irani. Hamasi nuk është një përfaqësues i Iranit, por është një partner,thotë Bork për Lead Stories.
Raphael Cohen, një shkencëtar politik në Korporatën RAND tha për Lead Stories se ai është shumë skeptik ndaj këtij pretendimi dhe se nuk ka gjasa që ukrainasit t’i shesin armë Hamasit për shumë arsye dhe renditi ato më të rëndësishmet.
Së pari, do të zemëronte njerëzit tek të cilët Ukraina mbështetet për ndihmë, kështu që do të ishte një vendim strategjikisht i pa logjikshëm. Së dyti, ata kanë nevojë për ato armë për t’u mbrojtur, kështu që ata nuk janë në gjendje të fillojnë të shpërndajnë armë diku tjetër. Dhe kur pyet veten se kush ka interes të promovojë një histori kaq të rreme të sajuar, mua më tingëllon si dezinformim rus. Në kuptimin që Rusia ka një interes në përpjekjen për të parandaluar dërgesat e armëve nga Amerika në Ukrainë, thotë Cohen.
Për të gjitha faktet e mësipërme, e vlerësojmë si të pavërtetë postimin që është temë i këtij shqyrtimi.
Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari