Nuk është e vërtetë që Perëndimi nuk e ka ndihmuar kurrë Ukrainën

Ukrainasit nuk dërgohen në front për të vdekur, por për të mbrojtur integritetin territorial të vendit të tyre. Ukraina nuk kërkoi luftë, por detyrohet të mbrohet kundër agresorit rus. Nuk është e vërtetë që Perëndimi nuk u interesua kurrë për Ukrainën. Vendet perëndimore po dërgojnë vazhdimisht ndihma në Ukrainë. Pretendimi se “ukrainasit u përdorën në mënyrën më të neveritshme, me qëllimin e vetëm për të dëmtuar Rusinë”, është gjithashtu i rremë dhe i përshtatet propagandës së Kremlinit. Në baza ditore qytetarët e Rusisë bombardohen me propagandë se NATO dhe SHBA si dhe Perëndimi kërcënojnë Rusinë dhe se NATO e shtyu Ukrainën në konflikt.

 

Ne analizojmë një postim në Facebook që bën disa pretendime manipuluese dhe të pasakta në lidhje me luftën në Ukrainë.

Zelenski:

“Pa ndihmën financiare nga Perëndimi, Ukraina nuk do të jetë në gjendje të paguajë pensionet. Unë nuk kërkoj mëshirë, por pa pensione të vjetrit thjesht do të vdesin.”

Dhe tani kjo:

Të gjithë të aftët për të punuar (përveç atyre që duhet të paguajnë) dërgohen të vdesin në front dhe pensionistët dënohen nga uria.

Perëndimi nuk është kujdesur kurrë për Ukrainën dhe popullin e saj.

Ukrainasit u përdorën në mënyrën më të neveritshme, me qëllimin e vetëm për të dëmtuar Rusinë.

Propaganda e suksesshme bëri punën e saj dhe ukrainasit ranë në kurth. Tani është vonë, thuhet në postim.

Postimi pretendon se çdo ukrainas i aftë u dërgua të vdiste në front. Ky është një pretendim manipulues duke pasur parasysh se Ukraina nuk kërkoi dhe as dëshironte luftë. Ukraina u sulmua nga Rusia dhe është normale të mbrohesh kundër agresorit. Ukraina po lufton për të çliruar veten, domethënë për të mbrojtur pavarësinë e saj dhe Rusia po lufton për të kapur sa më shumë territor ukrainas. Nëse Rusia pushon së luftuari dhe tërheq trupat e saj, lufta thjesht do të ndalet. Ukrainasit që dërgohen në front nuk dërgohen për të vdekur, por për të mbrojtur integritetin territorial të vendit të tyre. Dhe kur ka luftë, është normale që në të ka viktima. Në këtë rast ka viktima si nga pala ukrainase ashtu edhe nga ajo ruse.

Numri i ushtarëve të vdekur është vështirë të përcaktohet, të dyja palët nuk i bëjnë të ditur këto të dhëna. Për Rusinë, numri i vdekjeve nga pala ruse është sekret shtetëror dhe zbulimi i këtij numri dënohet me 7 vjet burg. Për numrin e viktimave dhe të plagosurve në luftë, nuk ka asnjë konfirmim as nga Qeveria e Ukrainës, as nga presidenti ukrainas, as nga Ministria e Mbrojtjes e Ukrainës dhe as nga ndonjë institucion tjetër zyrtar i Ukrainës. Çdo deklaratë mbi këtë temë mund të jetë ose spekulim ose në rastin më të mirë një vlerësim, por asnjë shifër aktuale për humbjet e saj nuk është bërë e ditur zyrtarisht.

Për më tepër, postimi pretendon se Perëndimi nuk është kujdesur kurrë për Ukrainën dhe popullin e saj. Ky është një pretendim i rremë.

Vendet perëndimore po e ndihmojnë vazhdimisht Ukrainën, financiarisht, ushtarakisht dhe me ndihma humanitare. Vërtematësi tashmë ka shkruar për këtë temë në shtator të vitit të kaluar. Sipas të dhënave të publikuara nga Al Jazeera në prill 2023, duke cituar Institutin e Kielit për Ekonominë Botërore, një institut gjerman, aleatët perëndimorë investuan të paktën 75.2 miliardë euro (80.5 miliardë dollarë) në ndihmë financiare, humanitare dhe ushtarake gjatë periudhës nga 24 janari deri më 20 nëntor 2022.

Me 47.8 miliardë euro (51.2 miliardë dollarë) angazhime, Shtetet e Bashkuara janë donatori më i madh i Ukrainës, me të paktën 22.9 miliardë euro (24.5 miliardë dollarë) të destinuara për qëllime ushtarake, 15.05 miliardë euro (16, 1 miliard dollarë) ndihmë financiare dhe 9.9 miliardë euro (10.6 miliardë dollarë) në ndihmë humanitare.

80.5 miliardë dollarë (sa vlen ndihma e aleatëve perëndimorë për Ukrainën në vitin 2022) përfaqëson vetëm 0.19% të produktit të brendshëm bruto të kombinuar (PBB) të Shteteve të Bashkuara dhe BE-së (42.1 trilion dollarë). Pavarësisht kësaj ndihme të vogël, Ukraina arrin të mbajë depërtimin e forcave ruse, madje të shkojë në një kundërofensivë. Mund të imagjinohet vetëm se çfarë do të ndodhte nëse aleatët perëndimorë do të jepnin ndihmë prej 3 përqind të PBB-së së tyre ose 1,263 miliardë dollarë. Është fare e sigurt se nëse NATO do të ishte në luftë me Rusinë, nuk do të ndante më pak se 0.2 për qind të PBB-së së saj për një luftë të tillë.

Ndihma ushtarake, siç është tani, përfshin armë, pajisje dhe ndihmë financiare për ushtrinë ukrainase. Ndihma humanitare përfshin mallra mjekësore, ushqimore dhe të tjera për civilët, ndërsa ndihma financiare vjen në formën e granteve, kredive dhe garancive.

Sa ndihma dërgojnë vendet perëndimore në Ukrainë mund të gjurmohet në faqen zyrtare të Institutit të Kielit për Ekonominë Botërore. 

Kur bëhet fjalë për në ndihmën e përkushtuar ushtarake, vendet e BE-së vazhdojnë të arrijnë dhe tani kanë tejkaluar SHBA-në, veçanërisht Gjermania dhe vendet nordike (Danimarka, Norvegjia, Suedia dhe Finlanda) kanë dhënë ndihma të reja të rëndësishme në muajt e fundit. Nga gjithsej 25 miliardë angazhimet e armëve të rënda (janar 2022 – tetor 2023), Shtetet e Bashkuara përbëjnë 43 për qind të vlerës totale, ndërsa të gjitha vendet dhe institucionet e BE-së së bashku përbëjnë 47 për qind. SHBA mbetet donatori më i madh ushtarak, me angazhime totale prej 44 miliardë eurosh. Por Gjermania po arrin shpejt, me detyrimet totale ushtarake që tani tejkalojnë 17 miliardë euro,raporton Instituti Kiel.

Sipas të dhënave të publikuara të Institutit, në periudhën nga 24 janari 2022 deri më 31 tetor 2023, nga gjithsej 42 donatorë, Bashkimi Evropian ka dhuruar më së shumti ndihma ushtarake, humanitare dhe financiare për Ukrainën, e ndjekur nga SHBA, Gjermania, Britania e Madhe dhe Norvegjia. Bashkimi Evropian dhuroi më së shumti ndihma financiare ndërsa më pas ushtria e Shteteve të Bashkuara.

Pretendimi se “ukrainasit u përdorën në mënyrën më të neveritshme, me qëllimin e vetëm për të dëmtuar Rusinë”, është gjithashtu një pretendim i rremë që përshtatet në propagandën e Kremlinit.

Çdo ditë qytetarët e Rusisë bombardohen me propagandë se NATO dhe SHBA, si dhe Perëndimi, kërcënojnë Rusinë dhe se NATO e ka shtyrë Ukrainën në konflikt.

Kur presidenti amerikan Joe Biden më 11 mars 2022 shpalli sanksione kundër Rusisë për pushtimin e saj në Ukrainë, ai deklaroi se presidenti rus Vladimir Putin ishte agresori.

Putinu është agresori. Putini duhet të paguajë çmimin. Rusia nuk mund të fillojë një luftë siç bën, e cila është një kërcënim për themelet më të mëdha të paqes dhe stabilitetit ndërkombëtar dhe më pas të kërkojë ndihmë financiare nga komuniteti ndërkombëtar, tha Biden. 

NATO dënon publikisht me retorikën më të fortë agresionin ushtarak brutal dhe të paprovokuar rus kundër Ukrainës, e cila është një shtet i pavarur, paqësor dhe demokratik dhe një partner i ngushtë i NATO-s. NATO dhe vendet anëtare vazhdojnë të mbështesin Ukrainën për të ruajtur të drejtën e saj themelore për vetëmbrojtje.

Veprimet e NATO-s janë mbrojtëse, të dizajnuara jo për të provokuar konflikt, por për ta parandaluar atë. Aleanca ka përgjegjësinë të sigurojë që kjo luftë të mos përshkallëzohet dhe të mos përhapet përtej Ukrainës, gjë që do të ishte edhe më e rrezikshme dhe akoma më shkatërruese, shkroi ai në faqen e NATO-s.

NATO dënoi gjithashtu të ashtuquajturin referendum për përvetësimin e rajoneve të Ukrainës në Rusi.

Përvetësimet territoriale që rezultojnë nga kërcënimi ose përdorimi i forcës nuk do të njihen si të ligjshme. Aleatët nuk do ta njohin kurrë përvetësimin e paligjshëm të Krimesë. Referendumet e rreme në Donetsk, Luhansk, Zaporozhye dhe Kharshon nuk janë legjitime dhe janë një shkelje brutale e Kartës së OKB-së. Aleatët e NATO-s nuk do t’i njohin ata. Ky territor i përket Ukrainës. Ne u bëjmë thirrje të gjitha vendeve që të refuzojnë përpjekjet e Rusisë për të pushtuar territore,thotë NATO.

Perëndimi ofron mbështetje për pavarësinë, sovranitetin dhe integritetin territorial të Ukrainës brenda kufijve ukrainas të njohur ndërkombëtarisht dhe qëndron për të drejtën e Ukrainës për vetëmbrojtje.

Udhëheqësit e BE-së kanë kërkuar vazhdimisht që Rusia të pushojë zjarrin, të tërheqë forcat ushtarake dhe pajisjet ushtarake nga Ukraina dhe të respektojë plotësisht integritetin territorial dhe sovranitetin dhe pavarësinë e Ukrainës. BE-ja thekson të drejtën e Ukrainës për të zgjedhur vetë fatin e saj dhe përgëzon popullin e Ukrainës për guximin e tyre në mbrojtjen e vendit të tyre.

Nga të gjitha faktet më sipër, mund të konkludojmë se postimi që po analizojmë përmban një sërë pretendimesh të pasakta dhe manipuluese. Ukrainasit nuk dërgohen në front për të vdekur, por për të mbrojtur integritetin territorial të vendit të tyre. Ukraina nuk kërkoi luftë, por detyrohet të mbrohet kundër agresorit rus. Është një gënjeshtër që Perëndimi nuk u interesua kurrë për Ukrainën. Vendet perëndimore po dërgojnë vazhdimisht ndihma në Ukrainë, financiare, humanitare dhe ushtarake, për të cilat ka të dhëna të publike. Pretendimi se “ukrainasit u përdorën në mënyrën më të neveritshme, me qëllimin e vetëm për të dëmtuar Rusinë”, është gjithashtu i rremë dhe i përshtatet propagandës së Kremlinit. Çdo ditë qytetarët e Rusisë bombardohen me propagandë se NATO dhe SHBA, si dhe Perëndimi, kërcënojnë Rusinë dhe se NATO e ka shtyrë Ukrainën në konflikt. Askush nuk dëshiron të dëmtojë Rusinë. NATO dhe BE dënojnë publikisht me retorikën më të fortë agresionin ushtarak brutal dhe të paprovokuar rus kundër Ukrainës. Për shkak të gjithë kësaj, ne e vlerësojmë postimin që po analizojmë si të pasaktë.

 

 

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari