Irlanda nuk ka marrë vendim për të dëbuar ambasadorin izraelit dhe për të paditur Izraelin në gjykatën në Hagë

Nuk ka asnjë vendim zyrtar nga Irlanda për të dëbuar ambasadorin izraelit dhe për të ngritur një padi kundër Izraelit në Gjykatën Ndërkombëtare të Drejtësisë në Hagë, siç pretendohet në postimin që po analizojmë. Është një kërkesë dhe thirrje e kryetares së partisë nacionaliste Sinn Fein, Mary Lou Macdonald, e cila mbajti një fjalim të ashpër kundër Izraelit, ndërsa shprehu mbështetje të madhe për Palestinën. Por Parlamenti irlandez i hodhi poshtë këto propozime

 

Po analizojmë një postim në Facebook, i cili pretendon se Irlanda ka vendosur zyrtarisht të dëbojë ambasadorin izraelit dhe ta çojë Izraelin në Gjykatën Penale Ndërkombëtare në Hagë.

Zyrtarisht. Irlanda ka vendosur të dëbojë menjëherë ambasadorin izraelit nga Dublini dhe të akuzojë Gjykatën Penale Ndërkombëtare (ICC) për gjenocid dhe krime lufte, sipas një postimi në Facebook.

Postimi shpërndau gjithashtu një video që pretendonte se ishte njoftimi zyrtar i vendimit të Irlandës.

Një kontroll nga Vërtetmatës tregoi se videoja shfaqte liderin e opozitës dhe kreun e partisë nacionaliste irlandeze Sinn Fein, Mary Lou McDonald dhe nuk lidhej me ndonjë njoftim për dëbimin e ambasadorit izraelit.

Nuk ka raportime nga mediat e besueshme apo faqet zyrtare të internetit në Republikën e Irlandës apo Irlandën e Veriut për dëbimin e ambasadorit izraelit nga asnjëri vend, apo ndonjë qëllim për të ngritur një padi kundër Izraelit në gjykatat ndërkombëtare për luftën në Rripin e Gazës.

Mary Lou Macdonald, udhëheqëse e partisë Sinn Fein në Irlandën e Veriut, më 11 nëntor të këtij viti i kërkoi Qeverisë së vendit të saj që të dëbojë ambasadorin izraelit dhe të nisë një hetim ndaj Izraelit në Gjykatën Penale Ndërkombëtare. Ajo dënoi veprimet e Izraelit si barbare, brutale dhe krime lufte, raporton faqja e verifikimit të fakteve Misbar.

Gjatë fjalës së saj, McDonald, duke i uruar mirëseardhjen ambasadorit palestinez, theksoi: (nga minuta 30 deri në minutën 31 të videos)

Populli palestinez meriton një atdhe pasi ka vuajtur shkelje masive të të drejtave të njeriut, ndarje racore, shtypje, okupim, të gjitha këto duhet të shqetësojnë thellësisht ndërgjegjen tonë kolektive. Sonte “ferri po bie” mbi Gazën. Gaza aktualisht po përjeton një sulm të pamëshirshëm, që rezulton në humbjen tragjike të jetës së një fëmije çdo 10 minuta. Pavarësisht pretendimeve të Izraelit për vetëmbrojtje, veprimet e tij synojnë civilët dhe imponojnë dënime kolektive. Masakra e mijëra fëmijëve nuk është vetëmbrojtje.

McDonald shtoi: (nga minuta 32:20 deri në 32:30 në video)

Izraeli nuk duhet të lejohet të kryejë krime të tilla pa u përballur me pasoja. Qeveria jonë duhet të veprojë me vendosmëri duke e referuar Izraelin në Gjykatën Penale Ndërkombëtare dhe duke dëbuar ambasadorin izraelit.

Parlamenti irlandez ka hedhur poshtë një mocion për dëbimin e ambasadorit izraelit

Propozimi në parlamentin irlandez, i cili kërkonte dëbimin e ambasadorit izraelit, u refuzua më 15 nëntor të këtij viti, raportoi britanikja Independent. Votimi erdhi pasi më shumë se një mijë protestues që bënin thirrje për dëbimin e ambasadorit organizuan një demonstratë jashtë Oireachtas, raportoi gazeta.

Propozimi i socialdemokratëve kërkonte një sërë sanksionesh ekonomike dhe diplomatike kundër Izraelit, duke përfshirë revokimin e kredencialeve diplomatike të ambasadorit të Izraelit në Irlandë, Dana Ehrlich. Propozimi, raporton The Independent, gjithashtu bën thirrje që Irlanda të përdorë ndikimin e saj në Bruksel për të kërkuar pezullimin e marrëveshjes tregtare BE-Izrael, duke cituar një klauzolë të të drejtave të njeriut në marrëveshje dhe për të pezulluar Izraelin nga pjesëmarrja në nismën e financimit të kërkimit në Horizon Europe.

Përveç kësaj, partia (Sinn Fein) kërkoi që Irlanda ta referojë Izraelin në Gjykatën Penale Ndërkombëtare, shtoi raporti i Independent. Ky propozim Sinn Fein, të cilin Parlamenti irlandez e debatoi javën e kaluar (15-16 nëntor), u refuzua gjithashtu. Agjencia Anadolia raportoi gjithashtu për votimin në parlamentin irlandez.

Një mocion në parlamentin irlandez që kërkonte dëbimin e ambasadorit izraelit u rrëzua të mërkurën dhe Qeveria paraqiti një kundërmocion. Amendamenti i Qeverisë irlandeze për mocionin e iniciuar nga Sinn Fein u miratua me 85 vota pro, duke hedhur poshtë sanksionet që Sinn Fein kishte kërkuar kundër Izraelit. Votimi u zhvillua pas debateve të nxehta në parlamentin irlandez në fund të ditës së punës të mërkurën në mëngjes, raportoi Anadolia.

Sipas raportimeve, më shumë se 11,320 palestinezë janë vrarë për shkak të agresionit izraelit në Rripin e Gazës, duke përfshirë 4,650 fëmijë dhe 3,145 gra.

Nga e gjithë kjo mund të konkludojmë se nuk ka asnjë vendim zyrtar nga Irlanda për të dëbuar ambasadorin izraelit dhe për të ngritur padi kundër Izraelit në Gjykatën Ndërkombëtare të Drejtësisë në Hagë, siç pretendohet në postimin që po analizojmë. Është një kërkesë dhe thirrje e kryetares së partisë nacionaliste, Sinn Fein, Mary Lou Macdonald, e cila mbajti një fjalim të ashpër kundër Izraelit, ndërsa shprehu mbështetje të madhe për Palestinën. Parlamenti irlandez i hodhi poshtë këto propozime. Prandaj, mund të konkludojmë se postimi është i pasaktë.

 

 

 

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari