Nuk është e vërtetë që tre personat e kërkuar për rastin “Onkologjia” janë arratisur jashtë shtetit

Rasti i Klinikës së Onkologjisë ka kaluar nga hetimi paraprak në hetim dhe dyshohen pesë persona. Mirëpo, sipas prokurores që udhëheq rastin, Ana Gogovska Jakimovska, nuk ka persona të cilët i kërkon Prokuroria Publike, të cilët janë të padisponueshëm, përkatësisht nuk ka persona të ikur jashtë vendit. Ka raste të tjera të izoluara në lidhje me Klinikën e Onkologjisë ku disa ish-punonjës të Klinikës së Onkologjisë janë gjykuar në mungesë, por kjo nuk ka të bëjë me rastin konkret.

Jemi duke shqyrtuar disa postime (këtu, këtu dhe këtu) në rrjetin social Facebook që raportojnë për veprimin e organeve hetimore të Klinikës së Onkologjisë në të cilin u ndaluan disa persona, por në të njëjtën kohë pretendohet në mënyrë të rreme se “tre janë arratisur jashtë vendit, ndërkohë që hetimet paraprake ishin në vazhdim”.

Hetimi paraprak për aferën “Onkologjia” nisi në shtator të vitit të kaluar dhe kulmoi me arrestimin e ish-drejtorëve që dyshohen për vepra penale të shpërdorimit të detyrës dhe autoritetit dhe mashtrimit në shërbim. Nga ana tjetër, tre mjekë dyshohen se kanë ndihmuar në këtë rast. Prokuroria Publike e Republikës së Maqedonisë së Veriut njoftoi se për dy të dyshuarit ka kërkuar masa, përkatësisht konfiskimin e pasaportave, ndalimin e daljes nga vendi dhe largimin nga Klinika. Përveç dy ish-drejtorëve, dyshohen edhe tre onkologë si ndihmës në mashtrim.

Prokuroria Themelore Publike Shkup, gjatë procedurës para hetimore ka ofruar prova të cilat krijojnë dyshime të arsyeshme se drejtorët e dyshuar të Klinikës me dashje kanë kryer disa veprime të lidhura me kohën që paraqesin ekzekutime të shumta të të njëjtit veprim, duke përfituar nga e njëjta marrëdhënie e përhershme dhe të njëjtat mundësi dhe me synimin për të përfituar financiarisht në kundërshtim me ligjin, se kanë mashtruar personin e autorizuar në fondin e sigurimeve shëndetësore për të bërë një pagesë të paligjshme të parave për blerjen e barnave që kanë shpenzuar dhe porositur në kundërshtim me rregulloret ligjore dhe nënligjore, pa një kolegjium ekspertësh të krijuar dhe pa protokolle të duhura mjekësore. Në këtë, qëllimisht janë ndihmuar edhe nga tre mjekët e tjerë të dyshuar të cilët kanë përshkruar terapi të caktuar jashtë rekomandimeve dhe me vetëdije duke iu shmangur parametrave që përshkruajnë gjendjen e pacientit në lidhje me sëmundjen, njoftoi Prokuroria Publike.

Më 30 janar, policia ka kontrolluar mjekët e Klinikës së Onkologjisë dhe ka ndaluar tre persona. Kërkimet kanë qenë pjesë e aksionit që ish-ministri i Punëve të Brendshme, Oliver Spasovski, para disa muajsh ka nisur me prokurorinë e Shkupit për një sërë keqpërdorimesh që kanë ndodhur në këtë klinikë. Hetimet u bënë për N.N, E.XH dhe N.V. Hetime ka pasur edhe para disa muajsh në fillim të shtatorit kur në Klinikë janë sekuestruar kartelat mjekësore dhe kompjuterët.

Prokuroria publike më 31 janar të këtij viti ka thirrur një konferencë për gazetarë, në të cilën ka marrë pjesë edhe gazetarja e “Vërtetmatësit” dhe ku është thënë nga prokurorja publike Ana Gogovska-Jakimovska, e cila është përgjegjëse për trajtimin e rastit, se “nuk ka persona të përfshirë në hetimin pas të cilit Prokuroria ka gjurmuar dhe të cilët janë të padisponueshëm për të, pra nuk ka të arratisur jashtë vendit”. 

Ndryshe, Prokuroria Themelore Publike Shkup vazhdon hetimin për rastin lidhur me punën e Klinikës së Onkologjisë dhe apeloi te të gjithë pacientët që të lajmërohen në Prokurorinë Publike dhe të raportojnë për çdo paligjshmëri dhe keqpërdorim të mundshëm që kanë parë, sepse njohuritë e tyre do të jenë jashtëzakonisht të rëndësishme në rrjedhën e mëtejshme të procedurës.

Për të gjitha faktet e mësipërme, ne i vlerësojmë postimet që po shqyrtojmë si pjesërisht të pavërteta. Nuk është e vërtetë se tre persona që autoritetet hetimore kërkonin për rastin e Onkologjisë janë larguar nga vendi. Nuk ka asnjë person që autoritetet hetimore kërkojnë për këtë rast konkret, i cili së fundmi ka kaluar nga hetimi paraprak në hetim, që nuk është në dispozicion të tyre. Ka raste të tjera të izoluara që lidhen me Klinikën e Onkologjisë ku disa ish-punonjës të Klinikës së Onkologjisë janë gjykuar në mungesë, por kjo nuk ka të bëjë me rastin konkret.

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari