Një tjetër dezinformatë për Bill Gates dhe Covid-19
Bill Gates nuk shet vaksina, por i ka dhuruar fondit të përgjithshëm global në një përpjekje për të luftuar pandeminë dhe për t`i ndihmuar vendet e varfra të marrin vaksina për të reduktuar vdekshmërinë. Dihet tashmë se Bill Gates është një ithtar i vaksinimit pasi beson q’ mund të përmirësojë cilësinë e jetës së njerëzve, t’u përgjigjet epidemive globale dhe të zgjasë jetëgjatësinë e njerëzve.
Po shqyrtojmë një postim në rrjetin social Facebook ku shkruhet:
Nëse ju kujtohet vitin e kaluar Gates ishte i zemëruar. Më pak njerëz vdiqën dhe më pak vaksina u shitën. Ata nuk mund të shpëtonin ata që kishin frikë nga vdekja.
Vërtetmatësi kërkoi në Google të gjitha deklaratat e Bill Gates që nga viti 2022 dhe nuk gjetëm asnjë deklaratë të tij që madje të ngjante me atë të paraqitur në postim. Gjatë pandemisë Covid, pretendimet e pabazuara për vaksinat me origjinë nga pjesët më të errëta të internetit ishin të përhapura gjithandej. Të gjitha llojet e informacioneve të rreme shëndetësore vazhdojnë të shpërndahen në mediat sociale, duke shkaktuar konfuzion dhe rrezik për shëndetin publik.
Gates nuk ka shitur kurrë vaksina
Postimi që po rishikojmë bën aludimin e rremë se Bill Gates “do që më shumë njerëz të vdesin” dhe se vaksinat po e shkaktojnë atë, gjë që është e pavërtetë. Gjithashtu, publiku duhet të dijë se Bill Gates nuk ka shitur vaksina kundër Covid. Dhe në të kaluarën kishte informacione të rreme sipas të cilave “Bill Gates tha se pret 700 mijë viktima nga vaksinat” dhe postimi që po shqyrtojmë shkon në linjën e këtij narracioni të rremë. Bill Gates, si fytyrë publike i vaksinimit kundër Covid-it, ka investuar mbi 300 milionë dollarë përmes Fondacionit Bill & Melinda Gates për një përgjigje adekuate ndaj koronavirusit dhe shpesh është lidhur me teori të ndryshme konspirative të cilat ai i quan “bizare”. Gates beson se ky dezinformim është i rrezikshëm dhe mund të dekurajojë shumë njerëz që të vaksinohen. Ka pasur edhe trillime në të kaluarën se Bill Gates dëshiron të vrasë njerëz me vaksina.
Katër organizata, përfshirë organizatën e Bill dhe Melinda Gates, kanë shpenzuar 10 miliardë dollarë për të trajtuar Covid që nga viti 2020. Ata kanë dhuruar kolektivisht 1.4 miliardë dollarë për Organizatën Botërore të Shëndetësisë, duke ndihmuar në krijimin e nismave kritike në betejën kundër pandemisë. Drejtuesit e këtyre katër organizatave kishin akses në qeveritë botërore, në Evropë dhe në Shtetet e Bashkuara. Këto organizata kishin një ide, një synim për të kapërcyer pabarazinë në shpërndarjen e vaksinave kundër Covid gjatë pandemisë. Duke punuar ngushtë me Organizatën Botërore të Shëndetësisë, të katër grupet luajtën një rol kyç në krijimin e një iniciative të quajtur “Përshpejtuesi për Qasjen në Mjetet e Covid”, i cili u fokusua në ofrimin e testeve, trajtimeve dhe vaksinave në vendet me të ardhura të ulëta dhe të mesme anembanë botës. Mekanizmi Kovacs, një konsorcium i veçantë, është shtylla kurrizore e kësaj nisme.
Reagimi global ndaj pandemisë
Fondacioni Bill dhe Melinda Gates u fokusua në mbështetjen e një përgjigjeje globale që siguronte që vendet me të ardhura të mesme dhe të ulëta të kishin akses në të dhënat dhe mjetet më të mira për t’u marrë me krizën, thotë Mark Suzman, drejtor i fondacionit.
Në disa fusha kemi pasur sukses. Për çështjen më të madhe, qasjen e barabartë në vaksina, bota në tërësi ka dështuar sepse vendet me të ardhura të larta fillimisht monopolizuan dozat e disponueshme, tha ai për Politico.
Trajtimi individual i sëmundjeve nuk do të zgjidhë shumë sfida globale shëndetësore. Puna në zonat e sëmundjes na lejon të identifikojmë të mirat publike që mund të rrisin ndikimin global të shëndetit dhe të zvogëlojnë kërcënimin e epidemive. Ne besojmë se inovacioni teknik ka një rol kyç në projektimin, zhvillimin dhe shpërndarjen e këtyre të mirave publike. Ne po investojmë në ekspertizë të thellë teknike dhe në platforma të reja të zhvillimit dhe prodhimit të vaksinave për të përshpejtuar inovacionin për vaksina më të mira, më të shpejta dhe më të lira. Ne gjithashtu investojmë në objekte me cilësi të lartë me të dhëna cilësore, thuhet në faqen e internetit të Bill dhe Melinda Gates.
Faqja e internetit e Fondacionit Bill & Melinda Gates ka një afat kohor të plotë të të gjitha aktiviteteve dhe financimeve që fondacioni ka dhënë gjatë pandemisë së Covid-it për të forcuar përgjigjen globale të vendeve ndaj pandemisë, me një fokus të veçantë në vendet me të ardhura të ulëta që ata të kenë mundësinë të merrni vaksinat në kohë, por edhe analizat dhe për të bërë një vaksinë të shpejtë. Por Bill Gates nuk i ka shitur këto vaksina, por ka dhuruar për përpjekjen e përgjithshme globale për të luftuar pandeminë, për të vaksinuar vendet e varfra dhe për të zvogëluar vdekshmërinë. Dihet tashmë që Bill Gates është një ithtar i vaksinimit që mund të përmirësojë cilësinë e jetës, t’i përgjigjet epidemive globale dhe të zgjasë jetëgjatësinë e njerëzve.
Për shkak të të gjitha fakteve të mësipërme, ne e vlerësojmë postimin që po shqyrtojmë si të pavërtetë. Bill Gates nuk u zemërua kurrë sepse “pak vaksina u shitën dhe pak njerëz vdiqën”.
Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari
