Në Tel Aviv kishte protesta masive kundër Netanyahut, por në mars, jo tani
Postimi që po analizojmë manipulon një video të vjetër të protestave masive në Tel Aviv kundër kryeministrit Netanyahu, e paraqitur kinse tregon protesta të reja në një kohë kur lufta në Rripin e Gazës po vazhdon. Që nga sulmi i Hamasit të 7 tetorit, ka pasur disa protesta në Izrael, por ato nuk kanë qenë aspak masive, pasi publiku është i pakënaqur që kryeministri nuk arriti të ndalonte sulmin dhe të ndihmonte të rrëmbyerit. Në Tel Aviv pati protesta masive, por në mars të këtij viti, kur populli doli në rrugë për shkak të reformave të shpallura në drejtësi.
Ne analizojmë një postim në Facebook ku shpërndahet një video e protestave masive në Tel Aviv kundër kryeministrit izraelit Benjamin Netanyahu, duke lënë të kuptohet se ato u zhvilluan tani, kur lufta në Gaza po vazhdon.
Protesta masive kundër Netanyahut në Tel Aviv, Izrael, thuhet në një postim të shpërndarë më 5 nëntor.
Në video shfaqen protesta masive në Tel Aviv që kanë ndodhur realisht, por jo pak ditë më parë, por 8 muaj më parë. Nëse e kërkoni videon në Google, do të zbuloni se ajo është postuar në rrjetin social X më 26.03.2023.
Protests in Central Tel Aviv pic.twitter.com/yveHG9ctgr
— Amichai Stein (@AmichaiStein1) March 26, 2023
Protestat masive shpërthyen në Izrael në mars të këtij viti pasi kryeministri Netanyahu shkarkoi një ministër që kundërshtoi rishikimin e gjyqësorit.
Turma të mëdha mbushën rrugët e qytetit izraelit të Tel Avivit të dielën vonë mbrëma pasi kryeministri Benjamin Netanyahu shkarkoi ministrin e tij të mbrojtjes për kundërshtimin e tij ndaj një rishikimi të planifikuar të gjyqësorit. Protestuesit duke valëvitur flamujt izraelitë dhe duke brohoritur “demokraci” mund të shihen duke bllokuar rrugët dhe urat, duke përfshirë autostradën Ayalon, raportoi CNN më 27 mars.
Kriza politike e Izraelit u thellua të dielën kur zyra e Netanyahut njoftoi në një deklaratë largimin e Yoav Galant, pasi ai u bë anëtari i parë i kabinetit që bëri thirrje për një pauzë në planet e diskutueshme për të riparuar sistemin gjyqësor të vendit, shtohet në raportimin e CNN.
Krahas kësaj, është publikuar edhe një video e protestave masive, në të cilën shihen të njëjtat pamje nga video e shpërndarë në postimin që po analizojmë.
Propozimet e qeverisë për të riparuar sistemin gjyqësor të Izraelit do t’i jepnin qeverisë kontroll mbi emërimin e gjyqtarëve dhe do t’i jepnin parlamentit fuqinë për të rrëzuar vendimet e Gjykatës së Lartë.
Qeveria izraelite ka argumentuar se ndryshimet janë thelbësore për frenimin e Gjykatës së Lartë, ndërsa kundërshtarët thonë se planet kërcënojnë themelet e demokracisë izraelite, raporton CNN.
Netanyahu e shpalosi planin në fillim të këtij viti, duke thënë se gjyqtarët e pazgjedhur të vendit kanë shumë pushtet mbi parlamentin. Ai mbështetet nga një aleancë e partive ultranacionaliste dhe fetare, secila e motivuar nga ankesa të ndryshme kundër sistemit ligjor, shkruan AP.
Nuk ka asnjë provë për protestat masive të fundit në Tel Aviv ku përfshihen mijëra njerëz. Mediat lokale raportuan për demonstratat në të cilat “qindra” kërkuan lirimin e të rrëmbyerve të mbajtur nga Hamasi.
Nga të gjitha sa më sipër mund të konkludojmë se postimi që po analizojmë manipulon në mënyrë që një video e vjetër e protestave masive në Tel Aviv kundër kryeministrit Netanyahu të paraqitet se tregon protesta të reja në një kohë kur lufta Izrael-Hamas është aktuale. Që nga sulmi i Hamasit të 7 tetorit, në Izrael janë mbajtur disa protesta, por ato nuk janë aspak masive, pasi publiku është i pakënaqur që kryeministri nuk arriti të ndalonte sulmin dhe të ndihmonte njerëzit e rrëmbyer. Në Tel Aviv pati protesta masive, por në mars të këtij viti, kur populli doli në rrugë për shkak të reformave të paralajmëruara në drejtësi. Për shkak të gjithë kësaj mund të themi se postimit i mungon konteksti.
Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari
