Premtimet e BDI-së për sh.f “Liria” në Tetovë mbetën vetëm fjalë, shkolla mbetet me kushte të këqia

ARSYETIM: Në Platformën zgjedhore të Bashkimit Demokratik për Integrim, zgjedhjet 2014-2018 (faqe 286), është premtuar rregullimi i oborrit të Sh.F. “Liria” në Tetovë. Si afat për përfundimin e punimeve është dhënë viti 2018. Deri më tani (18.04.2017) ky premtim është i parealizuar. 

17352949_243754639366643_2078743065_n

Foto1. Pjesë nga platforma zgjedhore e Bashkimit Demokratik për Integrim, 2014-2018;

Megjithatë, përveç oborrit kjo shkollë ballafaqohet edhe me probleme të tjera, si: çati e stërvjetëruar, tualete asnjëherë të rinovuara etj. Përkundër kësaj, më 10.11.2015 nga Komuna e Tetovës kishin njoftuar se është duke u punuar në këtë drejtim.

“…e kemi lajmëruar Ministrinë e Arsimit me gjendjen në këtë shkollë, ata kanë dërguar ekspertë dhe kanë kryer një ekspertizë në këtë drejtim, ku edhe kanë realizuar një projekt për renovimin e tërësishëm të kësaj shkolle. Me vërshimet në Tetovë, kjo shkollë u dëmtua edhe më shumë, ku me këtë është njoftuar edhe Qeveria, e cila e ka vërtetuar edhe gjendjen faktike në këtë shkollë dhe ka sjellë vendim që kjo shkollë duhet të renovohet…”. (burimi: Telegrafi, 10.11.2015)

Asgjë nuk është ndërmarrë as edhe në vitin 2016, përkundrazi gjendja e kësaj shkolle është rënduar edhe më shumë. Me reshjet e shiut, për shkak të çatisë tejet të vjetërsuar, uji kishte depërtuar edhe në katin e dytë, kështu duke rrezikuar nxënësit dhe stafin punues të shkollës. Nga drejtoria kanë theksuar se janë bërë të gjitha kërkesat e nevojshme për rinovim.

Kemi kontaktuar me Ministrinë e Arsimit dhe kemi kërkuar që të vijnë njerëzit kompetent për të konstatuar gjendjen faktike të shkollës tonë dhe të sanohet pullazi i objektit ose të gjendet ndonjë zgjidhje tjetër. Përgjigjja e tyre ka qenë se para zgjedhjeve nuk mund të bëhet asgjë, sepse tashmë investime nuk lejohen nga ana e Komisionit të Antikorupsionit”. (burimi: TV Koha, 09.11.2016)

Disa ditë më vonë, Ministria e Arsimit dhe Shkencës premtoi renovimin e çatisë së kësaj shkolle. Është bërë projekti final, ndërsa punimet do të realizohen në disa faza.

“Kemi edhe projektin final për rikostruimi e tërësishëm të këtij objekti shkollorë, që kushton mbi 30 milion denar por kjo do të shkojë nëpër faza, respektivisht faza e parë do të jetë ndërrimi i kulmit të shkollës, ndërsa në periudhën e ardhshme do të bëhet edhe faza e dytë, gjegjësisht rikostrumi i tërësishëm i objektit”. (burimi: Alsat-M, 14.11.2016)

Edhe pse MASH dhe komuna kanë dhënë leje për riparimin e objektit, ende nuk ka ndodhur asgjë konkrete. Rinovimi në këtë shkollë ka filluar pjesërisht. Me disa mjete të ndara nga Komuna e Tetovës, po rinovohen vetëm tualetet për nxënësit, ndërkohë që premtimi nga Ministria e Arsimit se me përmirësimin e kohës do fillojë rinovimi i çatisë ende nuk ka filluar të realizohet (burimi: Alsat-M, 26.02.2o17)

Nxënësit e Sh.F “Liria”, Tetovë vazhdojnë të ndjekin edhe sot (27.03.2017) mësimin në kushte të vështira. Prej kur është premtuar nga MASH që është përpiluar projekt për rinovimin e çatisë, në realitet me mjetet e ndara nga Komuna e Tetovës po rregullohen vetëm tualetet. Gjithashtu, kjo shkollë llogaritet si shkolla më e vjetër në Tetovë. Që nga 1 marsi i vitit 1945 në këtë vend ku ende nuk ishte ndërtuar objekti i shkollës u hap shkolla fillore me emrin “Liria” ku nxënësit mësonin në objekte të vjetra të ngelura nga medreset e kaluara. Prandaj, sipas metodologjisë së Vërtetmatësit, këtë premtim të sekretarit shtetërore të MASH, Safet Nezirit për rinovimin e objektit të shkollës, deri më tani (18.04.2017) e vlerësojmë si i parealizuar. 

BURIME:

Vlerësoi: Rabie Abazi


Ky artikull është përgatitur në kuadër të Vërtetmatësit, projekt për rritjen e llogaridhënies dhe përgjegjësisë së politikanëve dhe partive përpara qytetareve, i realizuar nga Fondacioni Metamorphosis. Artikulli mundësohet me përkrahje të fondacionit jofitimprurës amerikan (NED - National Endowment for Democracy) dhe Fondit Ballkanik për Demokraci, projekt i Fondit Gjerman të Marshallit në SHBA (BTD – The Balkan Trust for Democracy, a project of the German Marshall Fund of the United States), iniciativë e cila përkrah demokracinë, qeverisjen e mirë dhe integrimet euro-atlantike në Evropën Juglindore. Përmbajtja e recensionit është përgjegjësi e autorit dhe nuk i paraqet qëndrimet e Metamorphosis, National Endowment for Democracy, The Balkan Trust for Democracy, projekt i Fondit Gjerman të Marshallit në SHBA dhe partnerëve të tyre.

Leave a Reply

Your email address will not be published. Required fields are marked *