Nuk është e vërtetë që BE-ja dhe SHBA-ja po kryejnë gjenocid kundër popullit sirian

Postimi tenton të dezinformojë se BE dhe SHBA po kryejnë gjenocid kundër popullit sirian. Gjenocidi është një krim ndërkombëtar i shkatërrimit të qëllimshëm të plotë ose të pjesshëm të grupeve kombëtare, etnike, racore dhe fetare dhe i përket grupit më të rëndë të krimeve kundër njerëzimit. Pas tërmetit katastrofik të 6 shkurtit, BE dhe SHBA po ndihmojnë dhe po dërgojnë ndihma humanitare si për Turqinë ashtu edhe për Sirinë.

Po shqyrtojmë një postim të publikuar në rrjetin social Facebook ku thuhet:

BE, SHBA po kryejnë një gjenocid klasik ndaj popullit sirian!

Postimi është publikuar më 13 shkurt, pas tërmetit shkatërrues në Turqi dhe Siri.

Lufta në Siri, një nga krizat më të rënda me të cilat është përballur bota që nga fillimi i Luftës së Dytë Botërore, vazhdon të ketë pasoja tragjike për popullin e Sirisë dhe ka një efekt destabilizues në rajon, nëpërmjet zhvendosjes, përhapjes së terrorizmit dhe forcimit të dallimeve politike.

Që nga fillimi i konfliktit, BE-ja ka bërë thirrje për t’i dhënë fund dhunës së papranueshme në Siri, e cila vazhdon të shkaktojë vuajtje për miliona sirianë dhe shkatërrim të pallogaritshëm të infrastrukturës. Sulmet ndaj trashëgimisë kulturore janë gjithashtu një pasojë fatkeqe e konfliktit. BE-ja vazhdon të dënojë me retorikën më të fortë dhunën e vazhdueshme dhe keqpërdorimet e përhapura dhe sistematike të të drejtave të njeriut.

BE beson se nuk mund të ketë zgjidhje ushtarake për konfliktin dhe eliminimin e DAESH-it dhe entiteteve të tjera terroriste në Siri (të cilat janë të listuara nga Kombet e Bashkuara si entitete terroriste) dhe kërkon një zgjidhje politike për konfliktin në Siri.

Objektivat strategjike të BE-së në Siri përqendrohen në gjashtë fusha kryesore:

Përfundimi i luftës përmes një tranzicioni të vërtetë politik, i cili do të negociohet nga palët në konflikt me mbështetjen e aktorëve kryesorë ndërkombëtarë dhe rajonal.

Promovimi i një tranzicioni gjithëpërfshirës në Siri, duke mbështetur forcimin e opozitës politike.

Për të shpëtuar jetë duke adresuar nevojat humanitare të sirianëve më të cenueshëm në të gjithë vendin, në një mënyrë të shpejtë, efektive dhe parimore.

Promovimi i demokracisë, të drejtave të njeriut, lirisë së fjalës, duke forcuar organizatat joqeveritare siriane.

Promovimi i përgjegjësisë për krimet e luftës me qëllim të lehtësimit të procesit të pajtimit kombëtar dhe drejtësisë tranzicionale.

Organizata Evropiane e Mbrojtjes Civile dhe Ndihmës Humanitare është krahu humanitar i BE-së në Siri. Misioni kryesor i kësaj organizate është të shpëtojë jetë, të lehtësojë vuajtjet njerëzore dhe të mbrojë integritetin dhe dinjitetin e popullatës së prekur nga fatkeqësitë natyrore dhe krizat e shkaktuara nga njeriu. Me seli në Bruksel dhe një rrjet global zyrash, kjo organizatë siguron shpërndarjen e shpejtë dhe efektive të ndihmës së BE-së. Kjo organizatë është donatori kryesor për ofrimin e ndihmave humanitare brenda Sirisë dhe mban kontakte të përditshme me aktorë të ndryshëm humanitar në Siri.

Në Siri, organizata vepron me autonomi dhe e bazuar ekskluzivisht në parimet humanitare të neutralitetit të pavarur dhe ndihmës kur është e nevojshme. Zyra e organizatës në Damask i lejon BE-së të monitorojë nivelin e operacioneve humanitare në Siri dhe të komunikojë drejtpërdrejt me partnerët humanitar.

Si kudo në botë, dega e BE-së në Siri funksionon me autonomi të madhe. Puna e saj bazohet vetëm në parimet humanitare të ndihmës së pavarur, të paanshme dhe neutrale bazuar në nevojat. Zyra e organizatës (dega e BE-së në Siri) në Damask i mundëson BE-së të monitorojë shkallën e operacioneve të ndihmës humanitare në Siri dhe të angazhohet drejtpërdrejt me partnerët humanitar në terren.

Sanksionet ndaj Sirisë u vendosën për herë të parë në vitin 2011 si përgjigje ndaj represionit të dhunshëm të regjimit të Asadit ndaj popullatës civile. Sanksionet synojnë kompanitë dhe biznesmenë të shquar që përfitojnë nga lidhjet e tyre me regjimin dhe ekonominë e luftës. Masat kufizuese përfshijnë një ndalim të importit të naftës, kufizime për investime të caktuara, një ngrirje të parave të Bankës Qendrore të Sirisë në BE, kufizime në eksportin e pajisjeve dhe teknologjisë që mund të përdoren për shtypjen e brendshme, si dhe përgjimin e internetit, pajisjet dhe komunikimet telefonike.

Sanksionet e BE-së në Siri janë të dizajnuara për të shmangur çdo ndikim në ndihmën humanitare dhe për këtë arsye synojnë të mos ndikojnë në shpërndarjen e ushqimit, ilaçeve dhe pajisjeve mjekësore. BE-ja po monitoron zhvillimet në konfliktin sirian dhe mund të vendosë të rinovojë sanksionet dhe të zgjerojë listën e personave. BE mbetet e përkushtuar për të gjetur një zgjidhje politike të qëndrueshme dhe të besueshme për konfliktin në Siri.

BE-ja gjithashtu mbështet të shpërngulurit dhe mikpritësit e tyre në vendet fqinje të Sirisë.

Lidhur me faktin se më 6 shkurt ka ndodhur një tërmet shkatërrues në Siri, BE do të dërgojë ndihma jo vetëm në Turqi, por edhe në Siri. Regjimi në Damask pas tërmetit të tmerrshëm kërkoi ndihmë pavarësisht rivalitetit politik me BE-në, raporton Dojce Vele.

Komisioneri evropian Janez Lenarçiq ka hedhur poshtë kategorikisht akuzat se sanksionet ndërkombëtare po pengojnë ndihmën humanitare për viktimat e tërmetit. Ai tha për Dojce Vele se nuk ka asgjë që mund të pengojë në asnjë mënyrë dërgimin e ndihmave humanitare.

Më 9 shkurt 2023, Departamenti i Shtetit njoftoi për ndihmën e SHBA-së për Sirinë dhe Turqinë. Për Sirinë, në deklaratë thuhet se SHBA është në koordinim të ngushtë me organizatat partnere në Siri.

Partnerët tanë ekzistues humanitarë në Siri dhe Turqi po ofrojnë ambulancë kritike, ushqim, ujë, strehimore, kujdes mjekësor. Helikopterët nga SHBA kryejnë aksione, transportojnë shpëtimtarë në vendet më të nevojshme. Falënderojmë qeverinë e Turqisë për rihapjen e kufirit në mënyrë që ndihmat të hyjnë në Siri dhe të marrim lajme se karvani i parë i ndihmave të OKB-së ka mbërritur përmes vendkalimit Bab al-Hawa. Ne i bëjmë thirrje regjimit të Asadit që të lejojë menjëherë hyrjen e ndihmave përmes të gjitha pikave kufitare, të lejojë shpërndarjen e ndihmave në të gjitha zonat e prekura dhe të lejojë qasje humanitar pa përjashtim për të gjithë njerëzit në Siri në nevojë. Si në Turqi ashtu edhe në Siri, Shtetet e Bashkuara do të mbeten të përkushtuara për të bërë gjithçka që duhet, për aq kohë sa duhet, për të ofruar ndihmën e nevojshme për të prekurit nga këta tërmete. Shtetet e Bashkuara do të vazhdojnë të mbështesin popullin e Turqisë dhe Sirisë dhe inkurajojnë mbështetjen e partnerëve tanë ndërkombëtarë në këtë kohë kur nevoja është e madhe, shkruajnë ata nga atje. 

Për shkak të të gjitha fakteve të mësipërme vlerësojmë se nuk është e vërtetë që BE dhe SHBA po kryejnë gjenocid ndaj popullit sirian. Gjenocidi është një krim ndërkombëtar i shkatërrimit të qëllimshëm të plotë ose të pjesshëm të grupeve kombëtare, etnike, racore dhe fetare dhe i përket grupit më të rëndë të krimeve kundër njerëzimit. Pas tërmetit katastrofik të 6 shkurtit, BE dhe SHBA po ndihmojnë dhe po dërgojnë ndihma humanitare si për Turqinë ashtu edhe për Sirinë.

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari