Teatri dhe Biblioteka në Tetovë, mbeten vetëm një premtim
ARSYETIM: Projekti për ndërtimin e kësaj qendre të kulturës multi-funksionale është një prej projekteve kapitale të Qeverisë, i paraparë për t’u realizuar disa vite më parë. Me ndërtimin e kësaj qendre do të zgjidhet problemi hapësinor për më shumë institucione, si teatri, biblioteka, qendra e kulturës e të tjera, të cilat funksionojnë në një vend prej disa vitesh. Për herë të fundit është premtuar në Platformën zgjedhore të Bashkimit Demokratik për Integrim, zgjedhjet 2014 duke dhënë si afat të fundit për realizim vitin 2016. Deri më tani (16.01.2017) ky premtim është i parealizuar.
Më 20.12.2013 është marrë leja për ndërtimin e Teatrit dhe Bibliotekës së Tetovës, ndërsa gurthemeli për fillimin e punimeve u vendos më 28.11.2014. Në këtë ditë, i pranishëm ishte dhe zv/kryetari i Qeverisë së Republikës së Maqedonisë, Musa Xhaferi si dhe funksionarë të tjerë të Bashkimit Demokratik për Integrim.
Do fillojë ndërtimi i Teatrit dhe Bibliotekës, një vepër kapitale dhe meritore për Tetovën. Qeveria do vazhdojë me këmbëngulje të përmbushë premtimet që ka dhënë partia jonë në zgjedhje me të gjitha vështirësitë. (burimi: Yllpress.com, 28.11.2014)
Projekti i Teatrit dhe Bibliotekës së Tetovës kap vlerën e 13 milion eurove dhe pritet të përfundojë në vitin 2015 (sipas Platformës Zgjedhore të BDI-së, zgjedhjet 2014).
Punimet e filluara (më 28.11.2014) nuk po zhvilloheshin sipas dinamikës së duhur. Drejtori i Qendrës së Kulturës, Haki Fazliu kishte njoftuar se punimet kanë ngecur si pasojë e neglizhencës nga ana e kompanisë së energjisë elektrike EVN, e cila duhet të dislokojë nënstacionin elektrik të tensionit të mesëm, që gjendet pikërisht në vendin ku duhet të nisin punimet.
“Është një objekt i vjetër, por edhe me shumë kabllo që shtrihen nën tokë dhe askush nuk mund ta bëjë përveç EVN-së. I kemi kërkuar që ta bëjë zhvendosjen, madje edhe me një letër urgjente, por s’na ka ardhur asnjë reagim. I kemi kërkuar edhe operatorit teknik që kemi angazhuar për punimet ta bëjë këtë punë në vend të EVN-së, por pasi është në pyetje një pikë nevralgjike e furnizimit me rrymë të qytetit, ngurrojnë të intervenojnë”. (burimi: Portalb, 20.01.2015)
“Përveç problemeve të ndërtimit, pengesë tjetër kanë paraqitur edhe pronarët e barakave përreth, të cilët u ankuan me pretekstin se procesi i punës për ndërtimin e objektit i dëmton ato materialisht. Kjo çështje tanimë është në fazën e dytë të procedurës gjyqësore dhe do të vendos ligji se çka do bëhet me ta. Në ndërkohë, kanë ri-filluar punimet“. (burimi: Portalb, 07.10.2015)
Ndërkaq, më 28.11.2015 edhe një vit pas fillimit të punimeve, problemet e lartpërmendura nuk arritën të zgjidhen. Udhëheqësi i projektit të ndërtimit të bibliotekës dhe teatrit të Tetovës, Haki Fazliu kishte deklaruar se objekti do të ketë dy kate më pak, si pasojë e ri-balancit të buxhetit të shtetit.
“Unë nuk shoh se janë shkurtuar mjetet por ka një korrigjim projekti i cili me projekt ishte i planifikuar tre kate nëntokësore për parkingje të qytetit me karakter publik nga këto tre tash për tash janë dy, dhe një pjesë e cila në nën kulm parashihej të jetë pra nuk shoh se janë shkurtuar dhe me mjetet që janë në diskonim besoj që do kompletohet ky projekt”. (burimi: Alsat-M, 28.11.2015)
As edhe në vitin 2016 objekti i Teatrit dhe Bibliotekës në Tetovë nuk arriti të ngritet mbi themele. (burimi: TV Shenja, 28.06.2016)
Platformën zgjedhore të Bashkimit Demokratik për Integrim, si afat i fundit për përfundimin e punimeve u dha viti 2016.
Foto 1. Platforma zgjedhore e Bashkimit Demokratik për Integrim, Zgjedhjet 2014 *faqe 297
Nga gjitha këto të dhëna, mund të përfundojmë që premtimi për ndërtimin e objektit të Teatrit dhe Bibliotekës në Tetovë, deri më tani (16.01.2017) është i parealizuar.
BURIME:
- Platforma zgjedhore e Bashkimit Demokratik për Integrim, zgjedhjet 2014;
- |20.12.2013|Libraria dhe Teatri i Tetovës marrin lejet e fundit, ndërtimi pritet të fillojë në pranverë, ja si do duken (fri.org.mk, shikuar më 16.12.2016);
- |28.11.2014| Vendoset gurrthemeli, për ndërtimin e Teatrit dhe Bibliotekës në Tetovë (Yllpress, shikuar më 16.12.2016);
- |07.10.2015| Tetovë, ende nuk duken Teatri dhe Biblioteka (FOTO) (Portalb, shikuar më 16.12.2016);
- |20.01.2015| EVN pengon ndërtimin e Teatrit dhe Bibliotekës së Tetovës (Portalb, shikuar më 16.12.2016);
- |28.11.2015| Teatri dhe Biblioteka e Tetovës, mbetën në haresë (Alsat-M, shikuar më 16.12.2016);
- |28.06.2016| Teatri dhe biblioteka e Tetovës ende pa themele (TV Shenja, shikuar më 16.12.2016);
Vlerësoi: Rabie Abazi
Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari
