Putin nuk nënshkroi një dekret që hap derën e shtetësisë ruse për afrikanët

Vërtetmatësi nuk arriti të gjejë ndonjë lajm që konfirmon se Vladimir Putin ka lëshuar një dekret me të cilin afrikanëve u hapet rruga drejt shtetësisë ruse, punësimit dhe shërbimit ushtarak, siç pretendohet në postimin në fjalë. Një informacion i tillë nuk gjendet as në faqen zyrtare të presidentit të Rusisë. Putin ka nënshkruar disa dekrete në të kaluarën që u lehtësojnë të huajve që regjistrohen në ushtrinë ruse rrugën drejt shtetësisë, por nuk ekziston ndonjë dekret i veçantë që u dedikohet vetëm afrikanëve.

Ne analizojmë një postim në Facebook që thotë:

Presidenti rus Vladimir Putin ka lëshuar një dekret duke hapur derën për shtetësinë ruse, punësimin dhe shërbimin ushtarak për afrikanët.

Lajmi i fundit që kemi arritur të gjejmë, i cili lidhet me nënshkrimin e një lloj dekreti nga presidenti rus, është ai për mobilizimin pranveror të ushtarëve rusë.

Rusia do të nisë një fushatë pranverore të rekrutimit, në të cilën do të marrin pjesë 160,000 njerëz të moshës 18 deri në 30 vjeç, sipas një dekreti të nënshkruar nga Presidenti Vladimir Putin më 31 mars, raporton Libertas. 

Vërtetmatësi nuk arriti të gjejë ndonjë lajm që konfirmon se Vladimir Putin ka lëshuar një dekret me të cilin afrikanëve u hapet rruga drejt shtetësisë ruse, punësimit dhe shërbimit ushtarak, siç pretendohet në postimin që po e analizojmë.

Një informacion i tillë nuk gjendet as në faqen zyrtare të presidentit të Rusisë.

Në janar 2024, Putin nënshkroi një dekret që e përshpejtonte procesin e marrjes së shtetësisë për të huajt që do të regjistrohen në ushtrinë ruse.

Putin e lejoi për herë të parë dhënien e shtetësisë së shpejtë për të huajt që nënshkruajnë kontrata me ushtrinë ruse në shtatorin e vitit 2022, menjëherë pasi njoftoi mobilizimin e pjesshëm të 300,000 rezervistëve për Ukrainën.

Ata emigrantë që nënshkruan një kontratë për të paktën një vit dhe morën pjesë në operacione ushtarake aktive për të paktën gjashtë muaj u lejuan të aplikojnë për shtetësi pa pasur nevojë të demonstrojnë njohuri të mjaftueshme të gjuhës ruse ose pa pasur nevojë të kenë jetuar në vend për pesë vjet rresht me leje qëndrimi. Të drejtë aplikimi kishin edhe bashkëshortët dhe fëmijët. Autoriteteve iu kërkua të vendosnin për aplikime të tilla brenda tre muajve, sipas një dekreti presidencial në atë kohë.

Një tjetër dekret i Putinit nga maji 2023 thjeshtoi më tej procedurën: klauzola për pjesëmarrjen në operacione ushtarake aktive për të paktën gjashtë muaj u hoq dhe kushdo që kishte nënshkruar një kontratë të paktën njëvjeçare gjatë “operacionit special ushtarak” të Kremlinit në Ukrainë, si dhe bashkëshortët dhe fëmijët e tyre, u lejuan të aplikonin në procedurën e përshpejtuar.

Dekreti, i nënshkruar në janar 2024, e bëri edhe më të shpejtë rrugën drejt shtetësisë, duke thënë se vendimi për kërkesa të tilla nuk duhet të zgjasë më shumë se një muaj, në vend të tre, raportoi AP. 

Pra, Putin ka nënshkruar një dekret që thjeshton procesin e aplikimit dhe marrjen e nënshtetësisë ruse për të huajt që aplikojnë për të shërbyer në ushtrinë ruse, por ai nuk ka nënshkruar një dekret të veçantë për afrikanët.

Lidhur me pjesëmarrjen e afrikanëve në ushtrinë ruse, Forumi Afrikan i Mbrojtjes (AFD) raportoi më 7 janar 2025, se Rusia po josh afrikanët për të bërë luftë në Ukrainë.

Propaganda ruse shpesh paraqet histori të vullnetarëve nga kombet afrikane “miqësore” ose “neutrale” që i bashkohen ushtrisë për të luftuar në Ukrainë, por shumë nga këta rekrutë nuk dolën fare vullnetarë. Ata u dërguan në vijën e parë me mashtrim dhe detyrim.

Që nga fillimi i vitit 2024, gjithsej 3,344 shtetas të huaj që shkuan për të luftuar në Ukrainë u është dhënë shtetësia ruse, njoftoi Ministria e Brendshme ruse, raporton AFD.

Nga të gjitha faktet më sipër, mund të konstatojmë se njoftimi që po analizojmë është i pavërtetë.

 

 

 

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari