Pesë dezinformatat më të famshme pro-ruse të gazetarit Tucker Carlson

Hrushovi nuk ishte ukrainas dhe kjo nuk ishte arsyeja e transferimit të Krimesë nga Rusia në Ukrainë gjatë vitit 1954, Zelenski nuk u shet armë karteleve meksikane të drogës dhe nuk prodhon armë biologjike dhe Zelenski nuk është diktator dhe nuk e ndalon gjuhën ruse. Ky është një dezinformim nga burime (pro)ruse, i cili po përhapet në të gjithë hapësirën mediatike amerikane nga gazetari Tucker Carlson, i cili po ndikon edhe te ne.

Shkruan: Vangel Bashevski

Gazetari Tucker Carlson është i njohur për përhapjen e dezinformatave nga burime (pro)ruse në të gjithë hapësirën mediatike amerikane, të cilat na vijnë si një ndikim i dëmshëm i huaj (shembuj: këtu, këtu, këtu, këtu dhe këtu). Le të veçojmë pesë nga dezinformatat e tij më të rëndësishme dhe t’i analizojmë ato:

 

Hrushovi nuk ishte ukrainas dhe kjo nuk ishte arsyeja e transferimit të Krimesë

Do të fillojmë me rastin më të fundit të përhapjes së dezinformatave të Carlson-it, që ishte intervista e tij e datës 21 mars 2025 me diplomatin amerikan Steve Witkoff, i cili është i përfshirë në negociatat për luftën në Ukrainë dhe që është gjithashtu i njëanshëm ndaj Rusisë.

Witkoff iu referua rajoneve që Rusia aneksoi në Ukrainë: Krimea, Donetsk, Luhansk, Zaporizhia dhe Kherson, duke pretenduar gabimisht se popullsia vendase votoi për këtë në referendume, por nën okupim ato nuk mund të jenë legjitime dhe ato u refuzuan nga rezolutat e OKB-së (shih: këtu dhe këtu). Megjithatë, Carlson mbështeti Witkoff, duke shtuar:

Hrushovi, në një farë mënyre, thjesht i bëri ata pjesë të Ukrainës.

Nuk është e vërtetë që lideri sovjetik Nikita Hrushovi i mori të gjitha këto rajone nga Rusia dhe ia dorëzoi Ukrainës dhe Witkoff jo vetëm që nuk e korrigjoi Carlson, por u pajtua me të. Gjatë kohës së Hrushovit, vetëm Krimea u transferua nga sundimi rus në ukrainas dhe Carlson tha një pasaktësi tjetër për atë udhëheqës sovjetik:

Unë mendoj se Hrushovi ishte ukrainas.

Pas kësaj shprehjeje në dukje të pafajshme të opinionit fshihet dezinformata që daton që nga viti 2014, dhe qëllimi i tij është të fajësojë ukrainasit për padrejtësinë e shkaktuar ndaj Rusisë dhe të justifikojë pushtimin e saj të paligjshëm dhe aneksimin e Krimesë, që ndodhi atë vit.

Sidoqoftë, aneksimi i vitit 2014 nuk ishte një rikthim i thjeshtë i Krimesë në Rusi, por një riokupim i Krimesë nga Rusia. Rusia e pushtoi Krimenë në vitin 1783 nga tatarët e Krimesë, të cilët më pas i persekutoi, duke i reduktuar në pakicë dhe duke i zëvendësuar me rusë etnikë. Tatarët e Krimesë madje bënë një përpjekje të përbashkët me ukrainasit për t’u çliruar nga sundimi rus në vitin 1918.

Hrushovi nuk ishte ukrainas. Ai ishte nga rajoni i Kurskut të Rusisë dhe sipas tij dhe të afërmve të tij, ishte rus. Fshati i tij i lindjes është afër Ukrainës, por ai e përshkroi veten si etnikisht rus dhe fakti që ai punonte në Ukrainë dhe dikur e menaxhonte nuk e bën atë ukrainas, megjithëse e quanin me shaka dhe i pëlqente folklori ukrainas. Udhëheqësit e republikave sovjetike nuk duhej të ishin anëtarë të kombeve titullare të atyre republikave.

Shpjegimi zyrtar për transferimin e Krimesë në vitin 1954 ishte lidhja territoriale, ekonomike dhe infrastrukturore me Ukrainën dhe disa besojnë se kjo ishte e nevojshme për zhvillimin e Krimesë, e cila ishte lënë pas dore nën sundimin rus, veçanërisht pas Luftës së Dytë Botërore dhe persekutimit të tatarëve të Krimesë.

Të tjerë besojnë se qëllimi ishte gjithashtu ndryshimi i demografisë së Ukrainës duke përfshirë një numër të konsiderueshëm rusësh etnikë, dhe kjo u ndikua gjithashtu nga besimi i rremë se BRSS nuk do të shembet kurrë dhe se Ukraina dhe Rusia do të ishin përgjithmonë bashkë.

Ukraina nuk u shet armë kartelëve meksikanë të drogës

Në memorandumin e tij të datës 10.2.2025. Carlson tha:

Fakti i dytë. Është një fakt, jo një hamendje, por një fakt që forcat e armatosura ukrainase rishesin një përqindje të madhe, deri në gjysmën e armëve që ne u dërgojmë. Gjysmën! Dhe nuk e hamendësoj këtë, por e di me siguri që është një fakt. Fakt, në rregull? Jo spekulime. Dhe, ata i shesin dhe shumë prej tyre përfundon në duart e karteleve të drogës në kufirin tonë.

Carlson nuk ofron asnjë provë për këtë, megjithëse ai hedh fraza si: “Është një fakt”, gjë që në vetvete nuk vërtetojnë asgjë. Disa analistë janë marrë me këtë temë: këtu, këtu dhe këtu dhe ato akuza për Ukrainën bazohen në një lajm të një media meksikane për kartelet e drogës dhe armatimin e tyre, i cili u shtrembërua nga propagandistët rusë. Ukraina përmendet në lajme, por jo si burim për këto armë, por vetëm si një vend në të cilin përdoren armë të tilla.

Nuk ka asnjë provë që Ukraina po u shet armë karteleve meksikane të drogës, të cilat do të ishin shumë të ndërlikuara dhe jofitimprurëse për shkak të distancës dhe rrezikshmërisë, dhe që po të zbulohej, do të ishte e dëmshme për reputacionin e Ukrainës dhe kauzën e saj.

Dhe, Ukraina merrte kryesisht armë të rënda nga SHBA (HIMARS, NASAMS, Patriot, Abrams, etj.), të cilat nuk do të funksiononin për asnjë kartel droge. Sidoqoftë, Carlson shton gjithashtu si në vazhdim:

Agjencitë tona të inteligjencës janë plotësisht të vetëdijshme për këtë. Do të më thoni se ata nuk përfitojnë nga kjo, a mendoni se CIA nuk përfiton nga kjo? Po, ata e bëjnë këtë. Nuk mund ta vërtetoj, por e besoj.

Carlson madje akuzon vetë shërbimet e inteligjencës amerikane për përfshirje në tregtinë e armëve që Shtetet e Bashkuara u ofrojnë ukrainasve, gjë që nuk ka kuptim. Duke vepruar kështu, Carlson përsëri nuk ofron asnjë provë dhe madje pranon se nuk i posedon ato.

Dhe, mbi të gjitha, Donald Trump, i preferuari i Carlson-it dhe kritik ndaj Ukrainës dhe i njëanshëm ndaj Rusisë, është tani në pushtet në SHBA, kështu që pse Trump nuk e ndaloi atë tregti dhe nuk e ekspozoi atë?

Ajo që ka indikacione është se ka individë dhe grupe në Ukrainë që në atë kaos ushtarak po vjedhin armë dhe po përpiqen t’i shesin ato, por autoritetet ukrainase kryesisht po merren me atë problem dhe nuk është aq i madh sa të arrijë as në pragun e Shteteve të Bashkuara.

Ky problem është “pompuar” nga propagandistët rusë, të cilët besohet se publikojnë edhe vetë reklama të tilla në të ashtuquajturat “media sociale ruse” darkweb (segment kriminal i internetit ku shitet droga, arme etj.), per te denigruar ukrainasit dhe nuk ka kuptim që ata të shesin armët që u duhen për mbrojtjen dhe mbijetesen e tyre.

Zelenski nuk është diktator

Në një intervistë me gazetarin britanik Piers Morgan më 31 janar 2025, Carlson denoncoi Volodymyr Zelenskin si një “diktator”, duke pretenduar se ai nuk ishte zgjedhur në mënyrë demokratike. Por Zelenski u zgjodh në mënyrë demokratike President i Ukrainës në vitin 2019, dhe fakti që ai mbeti në pushtet pas skadimit të mandatit të tij nuk është diktaturë, por bazohet në nenin 11, paragrafi 3 i Ligjit ushtarak, sipas të cilit mandati zgjatet në një gjendje të tillë dhe sipas nenit 19, paragrafi 1, nuk mbahen zgjedhjet. Në mbështetje të tezës se Zelenski është një “diktator”, Carlson thotë gjithashtu se:

Ai gjithashtu ndaloi besimet fetare.

Ai ndaloi një grup gjuhësor dhe e gjithë kjo më duket si një karakteristikë e një diktature.

Këtu Karlson e injoron faktin se Kisha Ortodokse Ukainase (UPO) deri para pak kohësh ishte nën juridiksionin e Patriarkatës së Moskës, e cila mbështet agresionin rus. Prandaj, në KOU ekzistojnë elemente të “kolonës së pestë”, dhe për këtë arsye autoritetet ukrainase i vendosën një afat ligjor për reformimin e saj, sepse, në të kundërt, ajo do të ndalohet.

Dhe, përkundër asaj që sugjeron Karlsoni, Zelenski nuk e ka ndaluar gjuhën ruse dhe përdorimi i saj i lirë është i garantuar nga neni 10 i Kushtetutës së Ukrainës. Është e vërtetë se kishte paqartësi rreth një ligji që e privilegjonte tepër gjuhën ruse në disa rajone të Ukrainës, prandaj shumë njerëz ishin për heqjen e tij, për të cilën ne tashmë kemi shkruar, por kjo nuk do të thotë se ndalohet përdorimi i gjuhës ruse.

Në Ukrainë u zbatuan gjithashtu masa ligjore për të siguruar dominimin e gjuhës ukrainase mbi rusishten, sepse nën zgjedhën e Perandorisë Ruse, gjuha ukrainase ishte e shtypur dhe nën BRSS ajo u shtyp në mënyrë perfide në favor të rusishtes, e cila vazhdoi edhe në Ukrainën e pavarur nën udhëheqjen e politikanëve pro-rusë si Viktor Janukoviç.

Në intervistën me Morgan, Carlson thotë gjithashtu se:

Ai vret kundërshtarët e tij politikë.

Carlson tha diçka të ngjashme në një nga postimet e tij në Twitter më 1 mars 2025:

Ukrainasit kanë vrarë gjithashtu një numër njerëzish në vende të ndryshme në atentate politike dhe kanë tentuar të vrasin të tjerë, duke përfshirë gazetarë amerikanë dhe një kryetar shteti evropian. E gjithë kjo është e vërtetë dhe e gjitha do të dalë në dritë në një moment. Është më mirë të filloni të fajësoni Zelenskin për këtë tani.

Në vend që ta mbështesë me prova, Carlson thotë se “është e gjitha e vërtetë” dhe se “do të dalë në dritë në një moment”, gjë që është nën çdo nivel argumentimi.

Ai gjithashtu fajëson Ukrainën për vrasjen e propagandistit pro-rus Jamie White, por sipas të gjitha indikacioneve, ai u vra nga kriminelët pranë shtëpisë së tij në Austin të Teksasit. Carlson gjithashtu fajëson Ukrainën për vdekjen e propagandistit pro-rus Gonzalo Lira, një qytetar i Kilit dhe Shteteve të Bashkuara. Ai u ndalua në Ukrainë për arsyetim të agresionit rus, pas së cilës supozohej të ishte në arrest shtëpiak, por ai e shkeli këtë duke tentuar të kalonte ilegalisht kufirin me Hungarinë. Lira u kap dhe përfundoi në paraburgim, ku dyshohet se u sëmur dhe vdiq, gjë që është e diskutueshme, por nuk ka asnjë provë të fortë se ai u vra.

Gazetarët perëndimorë nuk e injoruan Putinin

Carlson është gazetari i parë amerikan dhe përgjithësisht perëndimor që intervistoi Vladimir Putinin pas pushtimit të gjithanshëm të Ukrainës, i cili përkeqësoi në mënyrë drastike marrëdhëniet midis Rusisë dhe Perëndimit. Carlson pretendoi se gazetarët perëndimorë e injoruan Putinin dhe nuk i dhanë atij një shans për t’u shprehur, gjë që Carlson dyshohet se ia dha për herë të parë. Mirëpo, një gjë të tillë e ka mohuar zëdhënësi i Putinit, Dmitry Peskov, i cili ka treguar se ka pasur kërkesa për intervista nga gazetarë perëndimorë, por se ato janë refuzuar si “jo objektive”, gjë që është konfirmuar edhe nga gazetarja Christiane Amanpour. 

Ukraina nuk prodhon armë biologjike

Carlson gjithashtu përhap një teori konspirative se Ukraina po prodhon armë biologjike me ndihmën e SHBA-së, por zyrtarët e OKB-së e mohojnë një gjë të tillë. Laboratorët për armë të tilla në fakt funksiononin në ish-BRSS, por pas rënies së saj, Shtetet e Bashkuara ndihmuan ish-republikat sovjetike të kontrollonin viruset e rrezikshme në laboratorët e tyre. SHBA dhe Ukraina kanë nënshkruar një marrëveshje për këtë, por nuk është për prodhimin e armëve biologjike. SHBA i ndihmon laboratorë të tillë si për qëllime shkencore, ashtu edhe për të luftuar sëmundjet, dhe laboratorë të tillë ka edhe në Rusi dhe atje janë zhvilluar vaksina kundër Covid.

 

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari