Pas Europës Lindore, Rusia kërkon tërheqjen e forcave të NATO-s nga Bullgaria dhe Rumania
Jo vetëm për vendet e Evropës Qendrore dhe Lindore, por kërkesa e Rusisë për tërheqjen e forcave të NATO-s (trupa të huaja, armë dhe pajisje) është për të gjitha vendet që nuk ishin anëtare të NATO-s në periudhën para vitit 1997. “Garancitë e sigurisë që Rusia kërkon nga NATO vlejnë edhe për Rumaninë dhe Bullgarinë,” tha ministri i jashtëm rus Sergei Lavrov, cituar nga Reuters.
Kërkesa e Rusisë për tërheqjen e forcave të NATO-s nga Rumania dhe Bullgaria është konfirmuar në një deklaratë për Radion Kombëtare Bullgare nga Ministria e Jashtme ruse.
Elementi i diskutueshëm i nismave tona të përmendura më sipër është formuluar shumë qartë dhe nuk lejon një interpretim të paqartë. Ai përfshin tërheqjen e forcave të huaja, pajisjeve, armëve dhe hapa të tjerë për t’u kthyer në konfigurimin e vitit 1997 në territorin e vendeve që nuk ishin atëherë anëtarë të NATO-s. Këto përfshijnë Bullgarinë dhe Rumaninë, tha Ministri i Jashtëm rus Lavrov në përgjigje të një pyetjeje me shkrim përpara konferencës së tij për shtyp më 14 janar.
Dy çështjet e tjera kryesore që Rusia po i kërkon NATO-s dhe Shteteve të Bashkuara janë: tërheqja e vendosjes së sistemeve të goditjes në afërsi të kufirit me Rusinë dhe ndalimi i zgjerimit të mëtejshëm të NATO-s në lindje.
Aleanca e Atlantikut të Veriut aktualisht ka 30 anëtarë, dhe shteti i fundit anëtar që i është bashkuar NATO-s është Maqedonia e Veriut në vitin 2020. Në vitet e fundit, Federata Ruse ka kundërshtuar hapur anëtarësimin e vendit tonë në NATO, ndaj ambasadori rus në Greqi, Andrei Maslov në një konferencë në Athinë në dhjetor 2018 para autoriteteve greke shprehu qëndrimin e Rusisë se është kundër anëtarësimit të Maqedonisë në NATO.
Përgjigja për kërkesat e tilla të Rusisë erdhi nga Sekretari amerikan i Shtetit, Anthony Blinken. Ai më 13 janar tha se dera e NATO-s për pranimin e anëtarëve të rinj do të jetë e hapur pavarësisht kërkesës së Rusisë për të ndaluar anëtarësimin e Ukrainës në NATO.
Në të njëjtën kohë, anëtarët e NATO-s në takimin e Këshillit NATO-Rusi hodhën poshtë kërkesat e Moskës që forcat ushtarake të Aleancës të tërhiqen nga vendet anëtare që iu bashkuan NATO-s pas vitit 1997. Anëtarët e NATO-s në takim kanë përsëritur tashmë qëndrimin e tyre se anëtarësimi në NATO është një vendim sovran i çdo vendi të pavarur dhe Rusia nuk ka të drejtë vetoje.
Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari