Numri i të vaksinuarve në Juglindje është më i lartë – ka qytetarë që udhëtuan dhe u vaksinuan në Shkup, Shtip, Serbi dhe Bullgari

Numri i personave të vaksinuar kundër Covid-19 mbi 18 vjeç në rajonin Juglindor është shumë më i lartë, siç shihet në të dhënat e publikuara nga Instituti i Shëndetit Publik. Kështu thonë menaxherët e disa prej qendrave shëndetësore përgjegjëse për të gjithë procesin. Sipas tyre, në të dhënat statistikore nuk janë regjistruar sipas vendbanimit personat që janë vaksinuar në Shkup, Shtip, ose në Serbinë dhe Bullgarinë fqinje, por të dhënat bazohen në numrin e të vaksinuarve në Strumicë, Radovish, Valandovë dhe Gjevgjeli.

Shkruan: Vane Trajkov

Në komunat e Juglindjes, vaksinimi kundër Covid-19 është duke u zhvilluar në të gjitha pikat, të cilat janë parashikuar në përputhje me programin e Ministrisë së Shëndetësisë. Në Strumicë, Radovish, Valandovë dhe Gjevgjeli, procesi i imunizimit filloi më intensivisht në fund të prillit dhe majit, pas mbërritjes së vaksinave. Një pikë rajonale e vaksinimit u hap në Strumicë, ndërsa në qytete të tjera në këtë pjesë të vendit qytetarët vaksinohen në hapësira të përshtatura për atë qëllim, në shtëpitë e shëndetit publik.

Në të dhënat e fundit për mbulimin e personave të vaksinuar, Instituti i Shëndetit Publik njoftoi se në Strumicë dhe rajon 34.8 përqind e popullsisë mbi 18 vjeç janë vaksinuar me një dozë, në Radovish dhe rajon 37 përqind, në Komunën e Valandovës 55.4 përqind, dhe në pikën në Gjevgjeli që mbulon komunat e Bogdancit dhe Dojranit, janë vaksinuar 61.5 përqind e popullsisë mbi 18 vjeç.

 

(Pasqyrë tabelare e mbulimit të vaksinimit në vend duke përfshirë 26 shtatorin)

 

Nga ISHP “Shtëpia e Shëndetit” Strumicë, thonë se numrat e të vaksinuarve dhe të rivaksinuarve nuk mund t’i referohen të gjithë popullsisë në rajonin e Strumicës, sepse ato janë numra të atyre që janë vaksinuar vetëm në pikën rajonale të vaksinimit. Drejtoresha Ljubica Miteva, thotë se shifrat e publikuara nuk përfshijnë banorët e Strumicës të cilët janë vaksinuar në Shkup, Shtip, Kavadar dhe ka pasur qytetarë që janë vaksinuar me vaksina falas nga Bullgaria, në pikën kufitare pranë Novo Sellës, por edhe në Serbi.

Pika jonë e vaksinimit u hap pak më vonë se të tjerat në vend. Gjatë asaj periudhe, bashkëqytetarët tanë u vaksinuan në Shkup, Shtip, Kavadar, por edhe në Serbinë dhe Bullgarinë fqinje. Sipas informacioneve tona, ky numër nuk është i vogël. Ja, si ilustrim, personeli mjekësor nga të dy institucionet shëndetësore nga Strumica, si dhe nga institucionet e tjera që janë të nivelit lokal, u vaksinuan kundër Covid-19 në Shkup dhe janë regjistruar atje. Prandaj, mendoj se përqindja e dhënë është vetëm për ata që janë të vaksinuar në pikën tonë, dhe jo për të gjithë qytetarët e rajonit të Strumicës, tha drejtoresha e ISHP “Shtëpia e Shëndetit” Strumicë, Ljubica Miteva.

Pika rajonale e vaksinimit në Strumicë, e cila ishte e vendosur në sallën e sportit në shkollën fillore “Nikola Vapcarov”, nuk do të jetë funksionale nga 4 tetori. Ajo është mbyllur sepse autoritetet besojnë se procesi i imunizimit mund të vazhdojë pa asnjë problem në ambientet e Shërbimit të Mjekësisë Sportive brenda spitalit të Strumicës.

Ne nuk e ndërpresim procesin e vaksinimit, por mbyllim pikën rajonale të vaksinimit. Qytetarët që duan të vaksinohen mund ta bëjnë këtë në departamentin e mjekësisë sportive të institucionit tonë ose më konkretisht në ndërtesën përballë spitalit modular. Vaksinimi në Strumicë vazhdon atje edhe nga 4 tetori dhe ka mjaft vaksina, tha Miteva.

Sipas të dhënave të fundit nga Instituti i Shëndetit Publik, 37% e popullsisë mbi 18 vjeç janë vaksinuar në Shtëpinë e Shëndetit në Radovish, e cila mbulon komunat e Radovishit dhe Konçës. Doza e parë e kanë marrë 9,586 persona, ndërsa të dytën 8,593. Drejtoresha Limonka Ilievska pohon gjithashtu se numri është joreal, e cila në një deklaratë për “Vërtetmatësin” theksoi se në fillim të imunizimit tek ata ishin në dispozicion vetëm vaksina “AstraZeneka”, e cila, nga ana tjetër, ishte dedikuar për të moshuarit mbi 60 vjeç. Gjatë asaj periudhe, një numër i madh i njerëzve nga Radovishi u vaksinuan në Shkup dhe pikën rajonale të vaksinimit në Shtip.

Kemi bërë edhe vaksinim në terren. I kemi vizituar nga dy herë vendbanimet në komunat e Radovishit dhe Konçës. Kishte interes dhe ne jemi mjaft të kënaqur. Punojmë në një ndërrim në ambientet e Shtëpisë së Shëndetit. Përveç zbatimit të procesit të vaksinimit, ne punojmë gjithashtu në edukimin e popullatës për përfitimet e marrjes së dy dozave të vaksinës. Duke pasur parasysh që numri i të infektuarve të rinj me Covid-19 në rajonin e Radovishit është zvogëluar, është zvogëluar edhe interesi i popullatës për imunizim, na tha Ilievska.

Në Komunën e Valandovës, deri më 26 shtator, 5,265 qytetarë morën dozën e parë të vaksinës, ndërsa 4,989 persona u rivaksinuan. Sipas ISHP-së, 55.4 përqind e popullsisë mbi moshën 18 vjeç janë vaksinuar me dozën e parë. Siç na shpjegoi drejtori i “Shtëpisë së Shëndetit” në Valandovë, Robert Markov, kjo përqindje është për shkak të edukimit të vazhdueshëm të popullatës lokale nga nevoja për vaksinim, si kushti i vetëm për fitimin e imunitetit kolektiv në luftën kundër Kovid-19

Kemi punuar vazhdimisht në edukimin e popullatës lokale, në të cilën janë përfshirë pothuajse të gjithë profesionistët e shëndetit. Ne jemi mjedis i vogël dhe përmes vaksinimit në terren dhe përmes pikës së vaksinimit në Shtëpinë e Shëndetit kemi punuar për të treguar që vaksinat janë të sigurta dhe mbrojnë nga komplikimet më të rënda të Covid-19, tha Robert Markov, drejtor i Shtëpisë së Shëndetit në Valandovë, ku sipas statistikave të fundit, që nga fillimi i pandemisë, 34 persona kanë vdekur nga komplikimet e shkaktuara nga virusi.

Qendra e Shëndetit Publik të Gjevgjelisë, e cila mbulon komunat Bogdanci dhe Dojran, është ndër komunat dhe rajonet udhëheqëse me numrin e personave të vaksinuar kundër Covid-19 në vend. Atje, me hapjen e pikës së vaksinimit, u rrit interesimi për vaksinimin, i cili zgjat me muaj. Sipas të dhënave të publikuara nga Instituti i Shëndetit Publik, deri në fund të shtatorit, 17,173 persona u vaksinuan me një dozë, ndërsa 16,494 qytetarë morën dozën e dytë, që është 61.4 përqind e popullsisë në këtë rajon.

Aktualisht në Gjevgjeli janë 86 raste aktive me Covid-19, ndërsa që nga fillimi i pandemisë janë infektuar 2,412 persona. Në këtë rajon, 77 njerëz kanë vdekur deri më tani nga komplikimet e shkaktuara nga virusi. Ditët e fundit, të rinjtë nën 19 vjeç të cilët nuk janë vaksinuar, regjistrohen si raste të reja të të infektuarve.

Për momentin, sipas asaj që kemi regjistruar në terren në Komunën e Gjevgjelisë, për shkak të transmetimit të gjerë, popullsia nga 12 deri në 19 vjeç, e cila nuk është vaksinuar dhe e cila nuk e ka kaluar Covid-19, është më e infektuar. Virusi gjen fushë pjellore këtu dhe kjo është arsyeja pse në 14 ditët e fundit, në zonën e mbuluar nga Qendra për Shëndetin Gjevgjeli, kemi 64 qytetarë të infektuar, tha epidemiologu Sashko Olumçev, i cili edhe një herë u dërgoi mesazh qytetarëve që të vaksinohen.

Instituti i Shëndetit Publik thotë se numrat janë rezultat i të dhënave të marra nga Qendrat për Shëndetin Publik dhe zyrat e tyre rajonale në vend. Çdo pikë vaksinimi është e detyruar t’u raportojë atyre se sa persona janë vaksinuar për një interval të caktuar kohor, dhe kërkesat dorëzohen në qendrën ose departamentin ku pika e vaksinimit i përket territorialisht.

Ky artikull është përgatitur në kuadër të Projektit për përballim të shpejtë të dezinformatave rreth vaksinimit, të zbatuar nga Fondacioni Metamorfozis. Ky artikull fillimisht është botuar në Vërtetmatës, ndërsa është mundësuar me mbështetjen e Fondit Ballkanik për Demokraci, projekt i Fondit Marshall Gjerman të SHBA-ve (BTD – The Balkan Trust for Democracy, a project of the German Marshall Fund of the United States). Përmbajtja e këtij artikulli është përgjegjësi e autorit dhe nuk pasqyron domosdoshmërisht pikëpamjet e Metamorfozis, FBD-së ose bashkëpunëtorëve të tyre.

 

 

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari