Një postim në Facebook përhap teoritë e njohura konspirative për kontrollin dhe izolimin e njerëzve

Teoricienët e konspiracionit, të cilët pretendojnë se pandemia ka qenë e rreme, vazhdimisht kanë përhapur narrativën për një lloj plani për të mbyllur qytetarët, për t’ua hequr liritë, për t’i kontrolluar, për të zvogëluar popullsinë, por edhe për t’i mashtruar që të besojnë në një “pandemi që nuk ekziston”. Antivaksinuesit, si pjesë e një grupi më të madh mbështetësish të teorive konspirative, këmbëngulin edhe sot se vaksinat kundër COVID-19 janë shpikur për të kryer krim, domethënë një gjenocid ndaj njerëzimit. Pikërisht edhe postimi që po e analizojmë, përhap këtë teori konspirative.

 

Po analizojmë një postim në Facebook që përhap disa teori konspirative, duke pretenduar se po “gatuhet” një rend i ri botëror.

RENDI I RI BOTËROR

Në SHBA po vendosen në masë të madhe pajisje të posaçme për ndjekjen dhe kontrollin e sjelljes së qytetarëve, konkretisht të shoferëve, të cilat natën ndriçojnë si llamba me dritë blu. Ato “mbijnë” ngadalë dhe prandaj nuk tërheqin shumë vëmendje, por tashmë janë vendosur në një numër të madh. Aftësia e tyre është të skanojnë në detaje fytyrën e shoferit (dhe të pasagjerit) dhe në këtë mënyrë të kenë kontroll mbi zakonet dhe rutinat e lëvizjes së qytetarëve. Një tjetër aftësi është dërgimi i sinjaleve në tru (nëpërmjet frekuencave të caktuara që lëshojnë), duke ndikuar kështu në aftësinë për të drejtuar makinën (duke shkaktuar të përziera, të fikët) dhe në këtë mënyrë ta detyrojnë shoferin të ndalojë makinën dhe të dalë prej saj.

Kjo është pjesë përbërëse e Agjendës 2030 të OKB-së, ku ndër të tjera planifikohet futja e “qyteteve të zgjuara”, që nënkupton vendosjen e kamerave në të gjitha pjesët e qytetit, veçanërisht në kryqëzime, me arsyetimin se ndihmojnë në lehtësimin e trafikut, si dhe në ruajtjen e rendit dhe sigurisë në qytete. (Edhe te ne, në Shkup, kanë filluar t’i vendosin masivisht, nëpër kryqëzime!). Kjo njihet si pjesë e agjendës trans-humaniste, e cila po shtyhet me ritme të shpejta ndaj njerëzimit nga Kombet e Bashkuara, Organizata Botërore e Shëndetësisë, Forumi Ekonomik Botëror dhe trupa të tjera të globalistëve.

Përpjekja për kontrollin e popullsisë botërore me pandeminë e parë nuk pati sukses, ndaj tani po instalohen pajisje të tjera, me metoda jo invazive (pa injektuar “diçka” në trup), por me të njëjtin qëllim – kontroll dhe manipulim!

Në të ardhmen, mund të presim jo vetëm përpjekje të tilla të rafinuara për ndjekjen e lëvizjeve të popullsisë botërore, por edhe një valë të re pandemish, siç e ka paralajmëruar edhe OKB-ja përmes Planit për Pandemitë të OBSH-së!

Teoria e konspiracionit për një rend të ri botëror, në të cilin do të ketë një qeveri të vetme, një fe të vetme dhe një ushtri të vetme, nuk është e panjohur dhe për të tashmë ka shkruar edhe Vërtetmatësi.

Në kontekstin e kësaj teorie të konspiracionit janë përhapur dezinformata se është prezantuar një “agjendë e Kombeve të Bashkuara nga viti 2021 deri në 2030”, duke iu referuar Agjendës 21 dhe Agjendës 2030 të Kombeve të Bashkuara, e cila përmendet edhe në postimin që është objekt i analizës sonë.

Siç ka shkruar tashmë Vërtetmatësi, Agjenda 21 është një nga dokumentet që ka dalë nga Konferenca e OKB-së për Mjedisin dhe Zhvillimin e mbajtur në Rio de Zhaneiro. Në këtë agjendë ka 31 pika që trajtojnë problemet globale sociale dhe ekonomike, forcimin e rolit të grave, fëmijëve dhe punëtorëve, si dhe metodat e propozuara për zbatimin e saj. Në këtë dokument nuk gjenden terma si “monedhë, ushtri, sovranitet…”, të cilat do të tregonin për ndonjë rend të ri botëror, siç pretendon postimi që po e analizojmë.

Agjenda për Zhvillim 2030, nga ana tjetër, është një rezolutë e miratuar nga OKB-ja në vitin 2015, e përqendruar në 17 objektiva që duhet të arrihen brenda 15 viteve. Këto janë:

Të përfundojë varfëria në të gjitha format dhe kudo, së bashku me urinë, të sigurohet që të ketë ushqim të mjaftueshëm dhe ushqyerje më të mirë dhe të promovohet bujqësia e qëndrueshme, të mundësohet jetë e shëndetshme dhe mirëqenie për të gjitha grupmoshat, të sigurohet arsim gjithëpërfshirës dhe cilësor dhe mundësi për të mësuar gjatë gjithë jetës për të gjithë, të arrihet barazia gjinore, të inkurajohen dhe fuqizohen gratë dhe vajzat, të sigurohet menaxhim i mirë i ujit, të garantohet qasje në energji të lirë, të sigurt dhe moderne, të promovohet rritje ekonomike dhe punësim dinjitoz për të gjithë, të ndërtohet infrastrukturë e qëndrueshme, të reduktohet pabarazia ndërmjet vendeve, të bëhen qytetet gjithëpërfshirëse, të sigurta dhe të qëndrueshme, të ndërmerren veprime urgjente për të luftuar ndryshimet klimatike dhe efektet e tyre, të ruhen oqeanet, detet dhe burimet detare për zhvillim të qëndrueshëm, të mbrohen ekosistemet tokësore, të menaxhohen pyjet, të promovohen shoqëri paqësore dhe gjithëpërfshirëse, të sigurohet drejtësi për të gjithë, dhe të ndërtohen institucione gjithëpërfshirëse në të gjitha nivelet.

Edhe në këtë agjendë nuk ka terma që do të konfirmonin se po propagandohet një rend i ri botëror me një qeveri, një fe dhe një ushtri.

Dritat blu janë shkaktuar nga defekte në llambat LED

Sa i përket pretendimit në postim se në SHBA po vendosen masivisht drita blu me qëllim ndjekjen dhe kontrollin e njerëzve, kjo nuk është e vërtetë. Është e saktë që drita të tilla janë shfaqur në disa shtete të SHBA-së, por arsyeja nuk është kontrolli apo ndjekja e njerëzve, por një defekt i thjeshtë në llambat LED. Siç shkruan USA Today, ngjyra e dritave nuk është e qëllimshme – ajo është rezultat i një defekti spektakolar në disa nga çipat LED, që ka ndodhur prej vitesh në ndriçimin rrugor në mbarë SHBA-në. Shkëlqimi karakteristik vjollcë është paraqitur dhe më pas është zhdukur nëpër të gjithë vendin, ndërsa llambat kanë filluar të dështojnë dhe janë zëvendësuar.

Ngjyra vjollcë vjen si pasojë e shpërbërjes së shtresës së fosforit dhe silikonit në çipat LED të ndriçimit rrugor. Ajo që kanë zbuluar studiuesit është se, në disa module, përzierja e verdhë e fosforit dhe silikonit që filtronte dritën blu për ta kthyer në të bardhë, ka filluar të çahet dhe të ndahet, duke rënë më pas dhe duke lejuar që drita blu e brendshme të dalë në sipërfaqe, shkruan USA Today.

Në postimin që po e analizojmë përmenden gjithashtu edhe disa të ashtuquajtura “qytete të zgjuara” (që zakonisht barazohen me konceptin e “qyteteve 15-minutëshe”) për kontrollin e njerëzve.

Vërtetmatësi tashmë ka shkruar për konceptin e “qyteteve 15-minutëshe”, dhe ai nuk përfaqëson asnjë lloj mbylljeje apo kufizimi të lëvizjes dhe nevojave të qytetarëve, siç përpiqen ta paraqesin teoricienët e konspiracionit. Kjo teori konspirative u përhap veçanërisht pas pandemisë së Covid-19.

Ekziston një ide për “qytetet 15-minutëshe”, por qëllimi i saj nuk ka të bëjë me mbyllje klimatike, e as me ndërtimin e ndonjë lloj “kampi”, siç pretendojnë teoricienët e konspiracionit.

“Qyteti 15-minutësh” është një qytet në të cilin shërbimet janë afër, e lehtësojnë jetën dhe u shërbejnë qytetarëve, thotë krijuesi i konceptit, profesori Carlos Moreno, për Euronews Next.

Postimi përhap dezinformata edhe rreth vendosjes së kamerave në rrugët e Shkupit, duke pretenduar se bëhet për kontrollin e njerëzve. Në të vërtetë, bëhet fjalë për sistemin “Qytet i Sigurt”, i cili ka për qëllim ndëshkimin e shkeljeve të rregullave të trafikut dhe rritjen e sigurisë rrugore dhe të qytetarëve në përgjithësi. Siç informoi Ministria e Punëve të Brendshme, kamerat do të regjistrojnë disa shkelje në trafik, siç janë: kalimi në dritë të kuqe, tejkalimi i shpejtësisë së lejuar dhe parkimi i parregullt.

Në postim përmendet edhe një agjendë transhumaniste, e cila gjatë pandemisë së COVID-19 u lidh me vaksinat kundër koronavirusit. Vërtetmatësi ka shkruar edhe për këtë teori konspirative, sipas së cilës përmes vaksinave njerëzve u injektohen nano-çipë që kanë për qëllim të ndryshojnë ADN-në njerëzore dhe të kontrollojnë njerëzit. Nuk ka dëshmi që njerëzve të vaksinuar, as tani e as në të ardhmen, t’u hiqen të drejtat e njeriut apo të ndryshohet “njerëzillëku” i tyre. Ky pretendim i rremë ndoshta bazohet në keqkuptimin e shkencës që është përdorur në zhvillimin dhe veprimin e vaksinave kundër COVID-19.

Postimi shpërndan edhe dezinformata se pandemia e COVID-19 ka qenë planifikuar qëllimisht për kontrollin e njerëzve. Kjo dezinformatë nuk është e re. 

Teoricienët e komplotit që pretendojnë se pandemia ishte e rreme vazhdimisht përhapën narrativin për një plan që qytetarët të mbyllen, t’u hiqen liritë, të kontrollohen, të ulet popullsia, por edhe të mashtrohen që të besojnë në “pandeminë që nuk ekziston”. Grupet anti vaksinë, nga ana tjetër, ende sot ngulmonin se vaksinat kundër COVID-19 janë shpikur për të kryer një krim, pra gjenocid ndaj njerëzimit. Edhe postimi që po analizojmë përhap këtë teori komplotiste.

Vërtetmatësi deri tani ka shkruar në shumë raste se pandemia dhe koronavirusi nuk janë shpikje, por realitet. Ne kemi rishikuar një numër të madh postimesh në rrjetet sociale që pretendonin se koronavirusi dhe pandemia janë të trilluar. Për këtë teori konspirative, për të cilën nuk ka asnjë provë, nuk ekzistojnë as studime shkencore që e konfirmojnë atë. Përkundrazi, ky virus në shkallë botërore dhe në vendin tonë ka marrë shumë jetë dhe ka ndryshuar mënyrën e funksionimit në të gjitha segmentet shoqërore.

Nga të gjitha sa u tha më sipër mund të përfundojmë se postimi që po analizojmë është i pavërtetë.

 

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari