Kundërspin: Spinime partiake për faqen e internetit “Vrasësit e Koçanit” të bazuara mbi dyshime

Spinat më të fundit rreth krijuesve të vërtetë të faqes së internetit të diskutueshme “vrasësit e Koçanit” (ubijcitenakocani.com), që filloi t’i përhapë VMRO-DPMNE, ndërsa as LSDM nuk mbeti imune, bazohen në një të ashtuquajtur “të vërtetë” e cila nuk mbështetet në asgjë tjetër, përveç DYSHIMEVE të kundërshtarëve politikë. Sulmimi i kundërshtarit politik me gjysmë të vërteta dhe të pavërteta është relativisht legjitim – sidomos në vendin tonë – si pjesë e fjalorit politik në një fushatë parazgjedhore. Por, vlerësimet se kufirin e ka kaluar njera apo tjetra palë (“nxitës zjarresh” apo krijues të faqeve të internetit nga të cilat “bëhet thirrje për vrasje politike”), ku “e vërteta” ndërtohet vetëm mbi bazën e dyshimeve, janë spinime të pastra

 

Shkruan: Teofil Blazhevski

 

Partitë kryesore politike në pushtet dhe në opozitë, VMRO-DPMNE dhe LSDM, gjatë dy ditëve të fundit kanë shpërfaqur spina të pastra lidhur me atë se kush e ka krijuar faqen e internetit ubijcitenakocani.com., duke e përdorur këtë në fushatën e tyre parazgjedhore për zgjedhjet lokale. Me spinet filloi VMRO–DPMNE më 17.09.2025 me komunikatën e parë partiake, pas së cilës vijoi një konferencë për shtyp dhe edhe disa komunikata të tjera.

Spin: VMRO-DPMNE me dënimin më të ashpër reagoi ndaj përpjekjes së turpshme, dashakeqe dhe monstruoze për keqpërdorim politik të ngjarjeve tragjike në Koçan, përmes shpërndarjes së fotomontazheve dhe akuzave të rreme ndaj kryeministrit dhe funksionarëve të tjerë.

Këto përmbajtje u publikuan në faqen e internetit ubijcitenakocani.com. Sipas raportit publik WHOIS të publikuar në faqen përkatëse, domeni është regjistruar dje, më 16.09.2025. Nga të dhënat e WHOIS nuk shihen detaje publike për regjistruesin e vërtetë apo pronarët përfundimtarë. Kjo mungesë e hapur e të dhënave, në kombinim me serverët e emrave të treguar dhe regjistruesin, tregon për një përpjekje për anonimitet dhe fshehje të porositësve dhe pronarëve të vërtetë të faqes, gjë që i forcon më tej dyshimet se bëhet fjalë për një fushatë të qëllimshme, të organizuar për manipulim politik dhe fshehjen e gjurmëve drejt iniciatorëve të vërtetë.

Sipas VMRO-DPMNE, është e qartë se pas këtyre përpjekjeve qëndrojnë struktura të afërta me Venko Filipçen dhe instalimet e tij, të cilat prej vitesh e keqpërdorin politikën dhe hapësirën publike për qëllime personale dhe partiake… (nga komunikata e 17.09)

…Në fund, a nuk ndjen Filipçe përgjegjësi të distancohet nga thirrja për vrasje ndaj kryeministrit, ministrit të Brendshëm dhe drejtorit të BSP-së? Në vend të kësaj, ata devijojnë vëmendjen për kallëzimet penale për të hequr qafe problemin e madh duke u marrë me çështje të vogla (nga një komunikatë tjetër e 17.09). 

[Burimi: VMRO-DPMNE – Njoftim1/Njoftim 2 – data; 17/18.09.2025]

Kundërspin: Pa dyshim, përmbajtja e kufizuar e faqes së re me fotomontazhet përhap gjuhë urrejtjeje që mund të çojë në dhunë të bazuar në urrejtje, por akuzimi i kundërshtarit politik se është krijues i faqes, në mënyrën si e bëri VMRO-DPMNE, partia në pushtet, është spin i pastër.

Nëse shikohet me kujdes përmbajtja e komunikatës, bëhet e qartë se pas këtij spini nuk qëndrojnë asnjë argument, përveç supozimit se kundërshtari politik LSDM mund të jetë krijues i një faqeje të tillë me qëllim fitimin e një pjese të elektoratit përmes tragjedisë së 16 marsit 2025, kur humbën jetën mbi 60 persona, kryesisht të rinj, në Koçan.

Saktësisht, VMRO-DPMNE thotë:

Nga të dhënat e WHOIS nuk shihen detaje publike për regjistruesin e vërtetë apo pronarët përfundimtarë. Kjo mungesë e hapur e të dhënave, në kombinim me serverët e emrave të treguar dhe regjistruesin, tregon për një përpjekje për anonimitet dhe fshehje të porositësve dhe pronarëve të vërtetë të faqes, gjë që i forcon më tej dyshimet se bëhet fjalë për një fushatë të qëllimshme, të organizuar për manipulim politik dhe fshehjen e gjurmëve drejt iniciatorëve të vërtetë. 

Nëse nuk shihen detajet për pronarët përfundimtarë dhe regjistruesin e vërtetë, nëse duket përpjekja për anonimitet dhe fshehje dhe nëse të gjitha këto tregojnë për një “forcim të DYSHIMEVE”, si mund të flitet publikisht se “për VMRO-DPMNE është e qartë se pas këtyre përpjekjeve qëndrojnë struktura të afërta me Venko Filipçen dhe instalimet e tij, të cilat prej vitesh e keqpërdorin politikën dhe hapësirën publike për qëllime personale dhe partiake…”? Dhe pse Filipçe duhet të distancohet dhe të kërkojë falje për dyshimet dhe spinin, dhe nëse nuk e bën këtë, atëherë kjo konsiderohet provë se ai qëndron pas krijuesve?

Ose, nëse ka dyshime dhe nëse vendi dhe Qeveria janë objekt i sulmeve hibride nga qendra të fuqisë brenda dhe jashtë vendit, ashtu si pretendon edhe kryeministri vetë, pse atëherë kjo faqe interneti nuk mund të jetë krijuar nga qendra të fuqisë jashtë vendit?

LSDM me kërkesë për të kërkuar falje, por edhe me spin që VMRO-DPMNE është krijuesi i faqes

Partia opozitare LSDM përdor në mënyrë të mençur argumentet fillestare të VMRO-DPMNE-së dhe publikon të gjithë dokumentacionin publik për regjistrimin dhe aktivitetet e faqes së internetit, duke përmendur edhe një detaj që VMRO-DPMNE nuk e përmendi në komunikatat e tyre.

Saktësisht, LSDM në komunikatën e datës 17.09.2025 ndër të tjera thekson:

Spin: …Zbulimi më i ri e Mickoskit dhe DPMNE-së sot është shpërndarja e mjegullës se dikush ka kërkuar “vrasjen e Mickoskit”. Saktësisht, faqja e internetit www.ubijcitenakocani.com
është krijuar më 16.09.2025 dhe është plotësuar me përmbajtje menjëherë para konferencës për shtyp të zëdhënësit partiak, në orën 11:58.

Ne pyetëm: a nuk është kjo një provë se faqja është krijuar për nevojat e tyre morbide të PR-it? Para konferencës për shtyp, faqja e internetit nuk ekzistonte dhe as nuk e kishte parë askush…

[Burimi: LSDM– Njoftim– data: 17.09.2025]

 

Kundërspin: Është një vlerësim politik i partisë të thotë se “zbulimi më i ri i Mickoskit dhe DPMNE-së sot është shpërndarja e mjegullës se dikush ka kërkuar ‘vrasjen e Mickoskit’” ose, siç thuhet në fillim të komunikatës, se “është patetike dhe zhgënjyese fushata e VMRO-DPMNE-së dhe Kristian Mickoskit, të cilët përpiqen të paraqiten si viktima para publikut” dhe se “këto përpjekje vetëm tregojnë dobësinë e këtij pushteti, i cili nuk ka projekte dhe nuk ofron politika – gjithçka që kanë ofruar deri tani janë gënjeshtra, manipulime dhe retorikë e zbrazët.”

Kjo, natyrisht, është një gjuhë legjitime (sidomos në vendin tonë) e një partie politike ndaj kundërshtarit politik. Por ajo që është spin, pra shtrembërim i së vërtetës, bëhet përmes pyetjes që sugjeron dhe krijon “të vërtetën”. Saktësisht, pasi partia konstatoi atë që konstaton edhe VMRO-DPMNE, LSDM, përmes faktit se aktiviteti i fundit në faqen e internetit ishte plotësimi me përmbajtje “menjëherë para konferencës për shtyp të zëdhënësit partiak, në orën 11:58”, përmes pyetjes krijon “të vërtetën”: “…a nuk është kjo një provë se faqja është krijuar për nevojat e tyre morbide të PR-it? Para konferencës për shtyp, faqja e internetit nuk ekzistonte dhe as nuk e kishte parë dikush…” Kjo nuk është asgjë tjetër veçse spin, pas të cilit gjithashtu qëndrojnë vetëm DYSHIME.

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari