Kundërspin: Spinet si “operacion statistikor” kundër regjistrimit

Nëse shikohet historia e kërkesave për shtyrjen e regjistrimit të popullsisë që duhet të zbatohet nga qeveria nën udhëheqjen e LSDM-së dhe nëse shikoni argumentet dhe “argumentet” në çdo problematizim të tillë të regjistrimit, nuk befason kërkesa aktuale nga VMRO-DPMNE për regjistrim elektronik vetëm 10 ditë para zbatimit të tij. Dhe përsëri, me argumente mbi bazë të spin-eve.

 

Shkruan: Teofil Bllazhevski

 

Aleksandar Nikoloski, nënkryetar i VMRO-DPMNE, dha një deklaratë në lidhje me regjistrimin e popullsisë, në të cilën vërehet spin:

Spin: Mënyra më e mirë për të kryer të gjithë këtë procedurë është të bëhet regjistrim elektronik, të cilin VMRO-DPMNE e kërkon gjatë gjithë kohës. Me regjistrim elektronik, pa vizita fizike tek qytetarët nëpër shtëpi, do të parandalohet përhapjen e infeksionit dhe ne do të jemi në gjendje të përcaktojmë saktësisht sa njerëz ka në Maqedoni në mënyrë që të mos ketë manipulime siç dëshiron tani qeveria. Pra, zgjidhja është regjistrim elektronik, për të mbrojtur shëndetin e qytetarëve dhe të mos ketë asnjë manipulim.

[Burimi: VMRO-DPMNE – web-faqe, data: 25.08.2021]

 

 

Kundërspin: Operacioni më i madh statistikor në vend – regjistrimi i popullsisë – u problematizua përsëri nga partia më e madhe opozitare vetëm dhjetë ditë para fillimit. Por, gjatë problematizimit përdoren spin-e, me çka manipulohet opinioni.

Nënkryetari i VMRO-DPMNE-së, Aleksandar Nikoloski, në përgjigje të pyetjes së një gazetari në lidhje me regjistrimin, i cili duhet të fillojë më 5 shtator, pohon se nuk ka kushte për mbajtjen e tij dhe se zgjidhja është regjistrimi të bëhet në mënyrë elektronike. Pandemia e koronavirusit dhe situata në vend, theksohet si arsyeja e parë, ndërsa me regjistrim elektronik “pa vizita fizike të qytetarëve në shtëpi, do të parandalohet përhapjen e infeksionit“. Dhe këtu qëndron spin-i parë në deklaratë.

Logjika është se regjistruesit janë potencialisht infektues, kështu që ata do ta transmetojnë virusin tek qytetarët, por Nikoloski nuk i thotë publikut se as për regjistrimin e prillit, i cili u anulua në kushte të ngjashme për shkak të rritjes së të infektuarve dhe të sëmurëve me koronavirus , u miratuan masa të rrepta parandaluese të formuluara në protokolle se si të shmangen rreziqet nga infeksioni.

As nuk i tregon publikut se të paktën gjysma e afërsisht 5,000 regjistruesve janë vaksinuar ose kanë shprehur gatishmërinë për t’u vaksinuar, as se si të llogaritet numri i qytetarëve të vaksinuar ose të shëruar që do të regjistrohen dhe, në fund, askush nuk mund të vlerësojë numrin e situatave ku do të jetë e mundshme që regjistruesi dhe regjistruesit ta kryejnë këtë proces në ambient ​​të hapur (korridor, oborr, etj).

 

“Matematikë e gëzuar”

Këtë herë, Nikoloski nuk shkoi në llogaritjet matematikore bazuar në parametrat e gabuar për të bërë vlerësime se sa do të ketë të infektuar të rinj dhe sa të vdekur, siç bëri në mars të këtij viti:

Një person, derisa t’i paraqiten simptomat, do të infektojë 9 persona të tjerë, që do të thotë se këta 5,500 regjistrues do ta transmetojnë virusin në 49,500 persona dhe në Maqedoni, shkalla e vdekshmërisë është 4.9 përqind, që do të thotë se regjistrimi në Maqedoni në prill do të thotë 2,400 të vdekur nga korona dhe do të thotë kolaps i sistemit shëndetësor sepse 50 mijë njerëz do të sëmuren. (intervistë në TV Sitel, nga sekonda 30 në video).

Ashtu si në këtë “matematikë të gëzuar” të gjithë numrat në operacionet e mbledhjes dhe shumëzimit janë të gabuar, sepse numrat e përdorur janë të gabuar, kështu që tani pa matematikë, Nikolski rrotullon se “pa vizita fizike te qytetarët në shtëpi, do të parandalohet përhapja e infeksionit“. Nuk ka asnjë supozim shkencor për këtë, përveç nëse nuk bëhet “bllokim (lockdown)” i plotë në të gjithë vendin.

Spin-i i dytë i Nikoloskit, dhe kështu i VMRO-DPMNE-së, është se me regjistrimin elektronik nuk do të ketë “manipulime siç dëshiron tani të bëjë qeveria“.

Asnjë argument nuk është përmendur në mbështetje të këtij pretendimi, e megjithatë ai përsëritet vazhdimisht. Për shembull, më 4 shkurt, i njëjti Nikoloski pohon se është e qartë:

… se bëhet fjalë për operacion politik, jo statistikor, se ka marrëveshje të qartë koalicioni për regjistrimin dhe nuk ka profesionalizëm, se metodologjia e përdorur nuk është në përputhje me standardet evropiane, por është metodologji politike dhe se në kohë krize korone, në pandemi, ai operacion statistikor është i pamundur (nga minuta 5.40 në video).

Nikoloski (dhe VMRO-DPMNE) i përfundon të gjitha këto nga fakti se Stevo Pendarovski dhe Zoran Zaev atëherë deklaruan se është e mundur të shtyhet regjistrimi i popullsisë për disa javë (!?), dhe kjo gjithashtu është pas kërkesave të vazhdueshme të VMRO-DPMNE-së.

 

Problematizim i vazhdueshëm me spin-e

Për t’i bërë gjërat më të qarta, duhet të theksohen disa fakte. Ligji u miratua në janar dhe Metodologjia e zbatimit u prezantua në mars. Si Ligji ashtu edhe Metodologjia kanë marrë kartë të gjelbër nga Eurostat, prej ku thonë se ato janë në përputhje me legjislacionin e BE -së.

Regjistrimi, për shkak të këmbënguljes së VMRO-DPMNE-së për rrezikun e paraqitur nga pandemia, tashmë ishte shtyrë për 29 mars, pas takimit mes liderëve të LSDM-së dhe VMRO-DPMNE-së, pas së cilës Zaev tha, ndërsa Hristijan Mickoski nuk e mohoi, se pas regjistrimit ishte edhe partia e tij.

Regjistrimi, edhe pse nuk u shty ligjërisht, filloi në formë elektronike për qytetarët që jetojnë jashtë vendit në prill dhe deri më tani ka mbi 200,000 qytetarë të regjistruar që hyjnë në hartën e popullsisë jorezidente, dhe që nga 1 marsi, tashmë janë regjistruar disa kategori qytetarësh – përfaqësuesit diplomatikë dhe konsullorë, të burgosurit në burgje, të pastrehët dhe ngjashëm.

Nëse do të ishte e mundur që e gjithë popullata të regjistrohej në mënyrë elektronike, shteti do ta kishte bërë këtë deri tani. Është e pamundur të kërkohet që regjistrimi të bëhet në mënyrë elektronike nga 5 shtatori, vetëm 10 ditë para fillimit, pasi do të duhej ndryshim i sërishëm i ligjit dhe anulim të regjistrimit.

Në shtet nuk është kryer regjistrim i popullsisë që nga viti 2002. Regjistrimi i vitit 2011 dështoi në rrethana të paqarta, ndërsa ish-PSP hapi hetim për pezullimin e regjistrimit në mes të operacionit, si marrëveshje midis kryeministrit të atëhershëm Nikolla Gruevski dhe kreut të BDI-së Ali Ahmeti. Ai hetim për hir të së vërtetës, nuk përfundoi me aktakuzë dhe proces gjyqësor.

VMRO-DPMNE edhe në vitin 2019 gjithashtu kundërshtoi zbatimin e regjistrimit të popullsisë, të cilin qeveria e planifikoi atëherë për vitin 2020.

Duke pasur parasysh të gjitha këto, si dhe ringjalljen e votave për të bojkotuar regjistrimin në rrjetet sociale, por edhe përmes deklaratave në media të figurave të caktuara publike pranë partisë se nuk do t’i lejonin regjistruesit nëse nuk do të kishin certifikatë vaksinimi, mund të konkludohet se partia opozitare vazhdimisht problematizon regjistrimin përmes spineve. Ata ngadalë po kthehen në një lloj “operacioni statistikor” kundër operacionit statistikor të regjistrimit të popullsisë që do të kryhet nga qeveria e partisë në pushtet LSDM.

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari