Kundërspin: A ishin Dimovska dhe Mijallkov njerëz të LSDM-së!?

Është e vërtetë ajo që tha Mickoski në fjalimin e tij në Akademinë Solemne me rastin e shënimit të 34-vjetorit të 8 Shtatorit – Ditës së Pavarësisë – se përgjohet dhe ndiqet që nga vitet ’90. Është e vërtetë edhe se një sistem i tillë i shtrembëruar shkatërron breza njerëzish, shkatërron fatet njerëzore, shpesh duke shpikur gjëra për individë që nuk ekzistojnë. Është e vërtetë gjithashtu se një abuzim i tillë me aparatin e sigurisë i shkakton dëm demokracisë. Ajo që është shtrembërim i së vërtetës, pra një “spin”, është se këtë e bëjnë të njëjtit njerëz dhe operativë të afërt me pushtetin e kaluar, pra me LSDM-në. E ndjera Dosta Dimovska, ministre e Punëve të Brendshme në kohën e “Veshit të Madh” dhe e akuzuar për atë rast, si dhe Sasho Mijallkov, drejtor shumëvjeçar i Drejtorisë për Siguri dhe Kundërzbulim, i akuzuar dhe i dënuar jo përfundimisht për aferën “Target”, formalisht kanë qenë dhe mbeten pjesë e historikut të VMRO-DPMNE-së

Shkruan Teofil Blazhevski

Kryetari i Qeverisë së RMV-së, Hristijan Mickoski, në një fjalim me rastin e 34-vjetorit të pavarësisë së Maqedonisë, shprehu një qëndrim lidhur me skandalin më të ri për keqpërdorimin e shërbimeve, në të cilin mund të dallohet një spin:

Përgjohet dhe ndiqet që nga vitet ’90. E njëjta strukturë, pothuajse të njëjtit njerëz dhe operativë, të afërt me pushtetin e kaluar, e kontrollojnë sistemin. Me hapa të tillë goditen themelet e demokracisë, cenohet rendi kushtetues, ndërsa pasojat e një sistemi të tillë të shtrembëruar jo vetëm që shkatërrojnë breza njerëzish, por e vënë në rrezik edhe tërë shtetin, duke ia servirur sistemin e sigurisë në pjatë. Goditje të tilla shkatërrojnë edhe fatet njerëzore, shpesh duke shpikur situata, kontakte, duke shtuar gjëra që nuk ekzistojnë. Për këtë jam dëshmitar edhe unë vetë, duke parë materialin nga përgjimi im.

[Burimi: Time.mk/Plusinfo.mk – H. Mickoski– 08.09.2025]

 

Kundërspin: Pjesa e deklaratës së kryeministrit Mickoski që kishte të bënte me aferën më të re për keqpërdorimin e shërbimeve të sigurisë, se “një e njëjta strukturë, pothuajse të njëjtit njerëz dhe operativë të afërt me pushtetin e kaluar e kontrollojnë sistemin”, në kontekst të abuzimit të tij, paraqet shtrembërim të së vërtetës, pra një spin.

Është e vërtetë ajo që tha Mickoski në fjalimin e tij në Akademinë Solemne me rastin e shënimit të 34-vjetorit të 8 Shtatorit – Ditës së Pavarësisë – se përgjohet dhe ndiqet që nga vitet ’90. Është e vërtetë gjithashtu se pasojat e një sistemi të tillë të shtrembëruar shkatërrojnë breza njerëzish, shkatërrojnë fatet njerëzore, shpesh duke shpikur gjëra për individë që nuk ekzistojnë. Është e vërtetë po ashtu se një abuzim i tillë me aparatin e sigurisë i shkakton dëm demokracisë. Ajo që është shtrembërim i së vërtetës, pra spin, është se këtë e bëjnë të njëjtit njerëz dhe operativë të afërt me pushtetin e kaluar, pra LSDM, ndonëse kryeministri këtu vendos një mbrojtje të vogël të kujdesshme me fjalën pothuajse. Por, ky “pothuajse” bën një ndryshim dramatik.

Rasti „Target – Kështjella“

Skandali më i madh me keqpërdorimin e shërbimeve shpërtheu në vitin 2015, kur lideri i atëhershëm i opozitës, më vonë kryeministër Zoran Zaev, publikisht pretendoi se posedonte, e më pas në vitin 2016 filloi të publikonte dhjetëra biseda të përgjuara, në të cilat ishin të përfshirë qindra figura publike, përfaqësues të opozitës, por edhe përfaqësues të pushtetit të atëhershëm. Bisedat mes funksionarëve të lartë të atëhershëm Mile Janakieski, Zoran Stavreski dhe Gordana Jankullovska, janë shembulli më i qartë.

Në vitin 2017 LSDM erdhi në pushtet, Zaev u bë kryeministër, por përmes ligjit special për Prokurorinë Speciale Publike (PSP), kjo aferë filloi gradualisht të marrë mundësi për zgjidhje juridike që në nëntor të vitit 2016, kur PSP hapi hetimin me emrin „Target“. Në qershor të vitit 2017, PSP njoftoi se në hetim dyshohen 10 persona, “atëherë, e disa edhe tani të punësuar në Drejtorinë për Siguri dhe Kundërzbulim (UBK) në pozita të ndryshme pune, nga strukturat më të larta deri te nivelet më të ulëta, për të cilët ekziston dyshim i bazuar se si bashkëkryerës kanë kryer veprën penale – Keqpërdorim të pozitës dhe autorizimit zyrtar, sipas nenit 353 paragrafi 5 të Kodit Penal”, deklaroi atëherë Fatime Fetai, njëra nga prokuroret e PSP-së.

Provat me të cilat disponojmë në këtë moment tregojnë për dyshim të bazuar se përmes sistemeve për ndjekjen e komunikimeve, në periudhën 2008–2015, në mënyrë të paligjshme janë përgjuar komunikimet e të paktën 4.286 numrave telefonikë, për të cilët fare nuk ishin lëshuar urdhra gjyqësorë për ndjekjen e tyre. Janë ndjekur komunikime edhe të numrave telefonikë në periudhën para se të lëshohej urdhri gjyqësor, si dhe pas skadimit të vlefshmërisë së urdhrit. Në këtë mënyrë, në mënyrë të paligjshme janë ndjekur komunikimet e të paktën 1.541 numrave telefonikë shtesë, ose gjithsej të paktën 5.827 numrave telefonikë. Përveç kësaj, janë përgjuar në mënyrë të paligjshme edhe të gjitha personat që komunikonin me numrat telefonikë që ishin cak i përgjimit të paligjshëm në atë periudhë, deklaroi Fetai. 

Rasti më vonë u bashkua edhe me çështjen e shkatërrimit të pajisjeve për përgjim dhe u ndjek nën emrin „Target – Kështjella“, ndërsa në procesin e shkallës së parë që përfundoi në vitin 2021, i dyshuari kryesor, Sasho Mijallkov, u shpall fajtor dhe gjykata e dënoi me 12 vite burg. Dënime jo përfundimtare me burg morën edhe funksionarë të tjerë nga atëhershmja Drejtoria për Siguri dhe Kundërzbulim (DSK) dhe Ministria e Punëve të Brendshme (MPB), duke përfshirë Goran Grujevski, Nikola Boshkovski, Toni Jakimovski, operativin Vladimir Varelov, Gordana Jankullovska si ministre e atëhershme, etj.

Gjykata e Apelit e ktheu çështjen përsëri në Gjykatën Themelore në Shkup, por procesi dështoi, pra përfundoi pa sukses, pas ndryshimeve në Kodin Penal të bëra nga pushteti i LSDM-së në vitin 2023, kur e njëjta prokurore nga PSP, Lençe Ristovska, u detyrua të tërhiqej nga rasti për shkak të parëndësisë së çështjes pas ndryshimeve në Kodin Penal.

Rasti „Veshi i madh“

Përgjim masiv, edhe pse rasti është i ndryshëm, pati edhe në aferën „Veshi i Madh“. Në janar të vitit 2000, Branko Crvenkovski, si lider i atëhershëm i opozitës LSDM, njoftoi se opozita kishte prova për përgjim të paligjshëm të qindra personave, përfshirë dhjetëra redaktorë dhe gazetarë (transkripte nga rreth 400 biseda). Qeveria e udhëhequr nga Ljubço Georgievski fillimisht e mohoi rastin, por menjëherë zhvilloi një hetim në Ministrinë e Punëve të Brendshme (MPB) përmes ish-ministres Dosta Dimovska, i cili nuk dha rezultate.

Prokuroria Themelore, e cila gjithashtu nisi hetim në të njëjtin muaj, janar 2000, e mbylli atë në vitin 2003 (pushteti ishte tashmë në duart e LSDM-së), ndërsa si të dyshuar për porositjen e përgjimeve ishin Dosta Dimovska dhe ish-kreu i teknikës operative në Drejtoria për Siguri dhe Kundërzbulim (DSK), Aleksandar Cvetkov.

Megjithatë, në vitin 2003, ish-presidenti i Republikës së Maqedonisë, Boris Trajkovski, amnistoi Dimovskën dhe Cvetkovin, dhe e vetmja zgjidhje juridike e rastit iu dha një dhjetëra gazetarëve, të cilët si të dëmtuar morën konfirmim në Strasburg, ku Gjykata për të Drejtat e Njeriut vendosi se e drejta e tyre ishte shkelur nga shteti që i kishte përgjuar në mënyrë të paligjshme.

***

Në rastin Duvlo, përgjimi masiv i parë në fillimet e viteve ’90 i partisë politike VMRO-DPMNE nuk ngre dyshime se është kryer nga persona të emëruar ose të afërt me LSDM (atëherë partia quhej ndryshe SKM-PDP). Në rastet „Veshi i madh“ dhe „Target“, të paktën formaliteti i ngjarjeve ishte ndryshe. As ish-ministrja Dimovska, e cila në vitet 2001/2002 u përplas me Gjeorgjievskin, as Sasho Mijallkov dhe të tjerët e dyshuar në rastin „Target“, nuk mund të quhen persona të LSDM-së ose të afërt me ta, edhe pse për të ndjerën Dimovska dhe për Mijallkov ekzistojnë histori të ndryshme nga lagjet e qytetit. Formalisht, ata kanë qenë dhe mbeten pjesë e historikut të VMRO-DPMNE-së, pavarësisht se liderët e kësaj partie dukshëm preferojnë t’i harrojnë.

Për këto arsye, fjalët e kryeministrit Mickoski, të theksuara në fillim të deklaratës që po rishikojmë, mund të vlerësohen si gjysmë e vërtetë, ose shtrembërim i së vërtetës dhe spin. Kjo fjali është thjesht vazhdim i deklaratës nga disa ditë më parë – kur LSDM është në pushtet, tradita është që shërbimet të keqpërdoren dhe VMRO-DPMNE të përgjohet dhe ndiqet.

E vërteta është shumë më komplekse dhe motivet e porositësve kurrë nuk do t’i dimë pa një zhvillim gjyqësor të këtyre rasteve. Lista e të përgjuarve dhe koha e përgjimeve është vetëm një nga treguesit për motivet dhe qëllimet përfundimtare të porositësve dhe organizatorëve të operacioneve të paligjshme.

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari