Është dezinformim morbid se mjeku Zhan Mitrev u qëllua për shkak se shpiku çajin “Hypertea”

“Vërtetmatësi” ka rishikuar vazhdimisht postime të rreme marketingu dhe manipuluese lidhur me shitjen e “Hypertea”. i cili në vend është produkt i regjistruar në kategorinë ushqimore (çaj), dhe jo në kategorinë e barnave apo pajisjeve mjekësore. Zhan Mitrev në asnjë mënyrë nuk është i lidhur me çajin “Hypertea”.

Po shqyrtojmë një postim në rrjetin social Facebook në të cilin shpërndahet një lidhje dhe një njoftim që pretendojnë rrejshëm se mjeku i njohur Zhan Mitrev “është vrarë” dhe se një ditë më parë kishte promovuar produktin Hypertea për pastrimin e enëve të gjakut.

Në orën 9:30 të mëngjesit, mjeku Zhan Mitrev u qëllua në makinën e tij. Tre të shtëna nga afër. Gjak në sedilje. Një turmë dëshmitarësh okularë të tronditur. Policia po shqyrton versionin e një vrasjeje me pagesë.

Ai kishte një sekret që askush nuk duhej ta dinte…, thuhet në njoftimin morbid të postimit që po shqyrtojmë, pas së cilës shpërndahet një video material i krijuar me inteligjencë artificiale.

Në video pretendohet rrejshëm se Zhan Mitrev “është qëlluar 3 herë dhe është rrëzuar në timon” dhe si “provë” vendoset një regjistrim krejtësisht i palidhur me një ngjarje të tillë. Në një pjesë të ekranit është vendosur një foto bardh e zi e Mitrevit, e cila supozohet se do t’i bindë edhe më shumë qytetarët se ai ka vdekur, që është një e pavërtetë dhe sajesë morbide.

Postimi në momentin e rishikimit ka 1700 shpërndarje dhe 523 reagime.

As mjeku nuk u qëllua dhe nuk u vra dhe as nuk promovoi një produkt të tillë. Hypertea nuk është një medikament i lidhur në asnjë mënyrë me Zhan Mitrevin, por një produkt që reklamohet në mënyrë kontroverse dhe të pandershme, me keqpërdorime të emrave të njohur nga bota e mjekësisë, me pretendime të rreme mjekësore dhe me metoda mashtruese marketingu.

“Artikulli”, i cili është pjesë e postimit të rremë, është një trillim dhe përmban inserte më të vjetra nga intervistat që Dr. Mitrev ka dhënë në raste të tjera dhe për tema të tjera. Atyre është redaktuar dhe shtuar një zë që supozohet të simulojë atë të doktor Mitrevit, por me tekst krejtësisht të sajuar. Zhan Mitrev nuk ka deklaruar asnjëherë se është në luftë me “mafien farmaceutike”, e cila po e kërcënon sepse “ka shpikur një ilaç”, as që ai ilaç është Hypertea. Vetë mënyra ku video shfaqet në ekran, zbulon një sërë të metash që mund të shihen si redaktim. Ka sinkronizim të dobët në zonën e gojës. Vërtetmatësi gjeti videon origjinale të abuzuar dhe të ripunuar në postim dhe është një video e vitit 2020. Mund ta shikoni në këtë link.

Siç edhe pritej, asnjë media dhe as në buletinin e Ministrisë së Brendshme nuk ka njoftuar ditët dhe javët e fundit se mjeku ka ndërruar jetë. Nëse kjo do të ishte e vërtetë, do të ishte informacion që me siguri do të ishte mbuluar nga të gjitha mediat. Marketingu manipulues luan me naivitetin e përdoruesve të mediave sociale për t’i mashtruar ata të blejnë një produkt nën presionin e ndonjë komploti se dikush u vra sepse ai shpiku një ilaç që nuk i sjell dobi industrisë farmaceutike. Ky skenar është përdorur shumë herë në Maqedoni të Veriut dhe viktima të tij janë mjekë të shumtë.

Publikimi përfshin edhe një intervistë të rreme që pretendohet të jetë me Zhan Mitrevin në formë të shkruar dhe e cila gjithashtu është e sajuar. Në tekstin e sajuar thuhet se “Mitrev u vra pasi hyri në luftë të hapur me Ministrinë e Shëndetësisë dhe mafien farmaceutike dhe shpiku preparatin Hypertea për trajtimin e enëve të gjakut”.

“Vërtetmatësi” ka recenzuar vazhdimisht marketingun e rremë dhe njoftimet manipuluese lidhur me shitjen e “Hypertea” i cili në vend është produkt i regjistruar në kategorinë ushqimore (çaj), dhe jo në kategorinë e barnave apo pajisjeve mjekësore. Zhan Mitrev nuk është në asnjë mënyrë i lidhur me Hypertea.

Në rajonin, “Index” i Kroacisë, ka publikuar hulumtime që fokusohen në kompanitë që promovojnë preparatet, përfshirë “Hypertea” në të gjithë Ballkanin me marketing të rremë.

Për të gjitha faktet e mësipërme, njoftimin që po shqyrtojmë e vlerësojmë si të pavërtetë.

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari