Ambasadorja gjermane nuk e përmendi popullin si fajtorin kryesor për korrupsionin

Holstein në konferencë për shtyp pas dorëzimit të pajisjeve të dhuruara për Ministrinë e Punëve të Brendshme, foli për korrupsionin dhe theksoi se të gjithë duhet të mësojnë se si të luftojnë korrupsionin, përfshirë edhe qytetarët. Askund në deklaratën e saj ajo nuk thotë se qytetarët janë fajtorët më të mëdhenj të korrupsionit. Përkundrazi, në fillim të deklaratës së saj, ajo i referohet kapitullit të procesit të anëtarësimit në Bashkimin Evropian që i referohet sundimit të ligjit dhe ai kapitull i referohet institucioneve, jo qytetarëve.

Përmes një postimi në rrjetin social Facebook pretendohet rrejshëm se ambasadorja gjermane në vend ka akuzuar qytetarët se ata janë fajtori më i madh i problemit të korrupsionit. Ky është një manipulim i plotë i deklaratës së ambasadores.

Në postimin në Facebook thuhet:

Sipas ambasadores së Gjermanisë në Maqedoni, fajtori kryesor për korrupsionin është populli i Maqedonisë, mos u jepni lekë mjekëve, profesorëve etj. Perlë në Perlë

Ambasadorja e Gjermanisë, Anke Holstein, është një nga diplomatët në Maqedoninë e Veriut, të cilët në muajt e fundit janë fokusuar në korrupsionin në vend dhe theksojnë se është një problem për të cilin duhet punuar në mënyrë aktive.

Në një konferencë për shtyp pas dorëzimit të pajisjeve të dhuruara për Ministrinë e Punëve të Brendshme, Holstein foli për korrupsionin dhe theksoi se të gjithë duhet të mësojnë se si të luftojnë korrupsionin, përfshirë edhe qytetarët.

Ka shumë gjëra që duhet të bëhen, dhe ky është rasti me Maqedoninë e Veriut dhe këtë e tha edhe presidenti im gjatë vizitës së tij. Varësisht se sa shpejt Maqedonia e Veriut do të bëjë përparim në rrugën e saj drejt BE-së varet nga sa shpejt do të zbatohen reformat. Dhe të gjithë jemi dakord që kjo është një detyrë veçanërisht e vështirë përpara, dhe kjo vlen jo vetëm për politikanët, por edhe për të gjithë njerëzit që duhet të kuptojnë se kur shkojnë te mjeku, nuk duhet të lënë kartëmonedhë në pallton e tij, ose nga ana tjetër, mësuesja duhet të dijë se nuk duhet të marrë dhuratë nga nxënësi për 8 Marsin, për të pasur një notë më të mirë. Të gjithë duhet të mësojnë, si më i vogli ashtu edhe më i madhi, se si bëhet lufta kundër korrupsionit, tha ambasadori.

Sipas saj, përparimi i Maqedonisë së Veriut në rrugën drejt Bashkimit Evropian do të varet në masë të madhe nga luftimi i suksesshëm i korrupsionit. Ajo përmend edhe reformat, të cilat i zbatojnë politikanët dhe institucionet, jo njerëzit.

Askund në deklaratën e saj ajo nuk thotë se qytetarët janë fajtorët më të mëdhenj të korrupsionit. Përkundrazi, në fillim të deklaratës së saj, ajo i referohet kapitullit të procesit të anëtarësimit në Bashkimin Evropian që i referohet shtetit të së drejtës dhe ai kapitull i referohet institucioneve, jo qytetarëve.

Holstein në fakt i referohet Kapitullit 23 të Metodologjisë së Negocimit, i cili ndahet në katër fusha kryesore dhe të ndërlidhura në mes vete: drejtësia, lufta kundër korrupsionit, të drejtat themelore dhe të drejtat e qytetarëve të BE-së. Për luftën kundër korrupsionit thuhet:

Shtetet anëtare duhet të luftojnë në mënyrë efektive korrupsionin, pasi ai përbën kërcënim për stabilitetin e institucioneve demokratike dhe sundimin e ligjit. Nevojitet kuadër ligjor solid dhe institucione të besueshme për të mbështetur një politikë koherente për parandalimin e korrupsionit.

Me deklaratën ajo dëshiron të theksojë se të gjithë duhet të luftojnë kundër korrupsionit, nga politikanët e deri te qytetarët. Është krejtësisht e pasaktë se ajo ka akuzuar qytetarët për korrupsion dhe as nuk i ka përmendur, si fajtorët kryesorë të korrupsionit. Kjo është një kthesë e plotë e deklaratës së ambasadores në një drejtim të gabuar dhe të pasaktë.

Ky shtrembërim i së vërtetës bëhet për të krijuar përshtypje të gabuar tek ambasadorja, si dhe tek gjithë komuniteti ndërkombëtar në vendin tonë, i cili është i përkushtuar për ecurinë dhe zbatimin e reformave.

Kur lexojnë diçka të tillë në rrjetet sociale, përdoruesit mund të besojnë se ambasadorja vërtet e konsideron popullin si fajtorin më të madh për problemin e korrupsionit. Kështu janë edhe përdoruesit që kanë shkruar komente në këtë postim, sepse kanë besuar në atë që është shkruar. Por me dy klikime në motorin e kërkimit Google mund të kontrolloni dhe të shihni se çfarë tha në të vërtetë ambasadorja.

Për të gjitha faktet e paraqitura, këtë postim manipulues e vlerësojmë si të pavërtetë.

Të gjitha komentet dhe vërejtjet në lidhje me këtë dhe artikujt e tjerë të Vërtetmatës-it, kërkesat për korrigjime dhe sqarime, si dhe sugjerimet për verifikimin e deklaratave të politikanëve dhe premtimeve të partive politike, mund t’i dorëzoni përmes këtij formulari